INZU YA ZAHABU

J. Rouw

Ikaze

Iyo nyubako ya zahabu ntabwo yari ifite ahayo hitaruye, ahubwo yari ishinzwe hagati y’amahema menshi. Hari amahema ibihumbi adafite amabara ashashagirana, atuwemo n’abahoraga bimuka bagendagenda mu butayu. Ntabwo bari ubwoko butoya busuzuguritse, bari ubwoko bunini cyane bugizwe n’amamiliyoni y’abantu.

Iyo bahagurukaga, bari umurongo w’abantu muremure cyane ugizwe n’abagabo, abagore n’abana ndetse bashoreye n’imikumbi yabo. Aho baruhukiraga bahashingaga amahema hakaboneka ingando nini cyane. Babikoraga muri gahunda nziza ya mpande enye: imiryango 3 mu mjyaruguru, 3 mu burasirazuba, 3 mu majyepfo, 3 mu burengerazuba.

Iyo nzu ya zahabu n’amahema yahoraga ishinze hagati y’ingando: yari inzu y’IMANA. Mu by’ukuri ntabwo amahema ubwo bwoko bwari butuyemo yajyanaga n’ubwiza bw’iyo nzu; nk’uko abo bantu bari batandukanye n’Imana. None se ni iki cyari muri ayo mahema? Buri rugo rwari rufite ibibazo n’ingorane zarwo, ndetse intambara n’amakimbirane.

Yemwe, niba twabashaga kurunguruka muri yo ngo twumve ibivugirwamo! Ni iki cyagaragaramo? Ibihuje neza rwose n’ibyo mu mitima yacu: kwizirikana, kwishyira hejuru, ibitekerezo bibi, kudakundana, ndetse akenshi hakabamo urwango.

Ijuru kw’isi

Nonese iyo nzu ya zahabu, inzu y’Imana ikora iki aho hagati y’abo bantu? Ni kuki Imana ishaka gushyikirana n’abantu bateye batyo? Ni kuki itabatererana? Ni kuki itigumira mw’ijuru…?

…Imana yaje hano mw’isi. Yubakishije iyo nzu yayo hano mw’isi. Yifuza gutura hagati mu bantu – irabyifuza uyu munsi kandi niko bizagenda ubwo hazabaho ijuru rishya n’isi nshya. Ibyahishuwe 21.1-3 haranditse ngo: “Dore ihema ry’Imana riri hamwe n’abantu kandi izaturana nabo…”

Inzu y’igikundiro

Inzu ya zahabu, iyo nzu y’Imana, yerekana Umwana w’Imana, ikavuga Imana n’ijuru. Amateka y’”Ihema ry’ibonaniro” cyangwa “ubuturo bw’Imana” mu butayu ntabwo ari ukugaragaza aho basengeraga gusa, ahubwo rifite insobanuro yihariye. Ese ubundi ni iki bimaze kuvuga ingero, uburemere n’ibikoresho byaryo? Byari ngombwa se kubivuga mu bice byinshi bya Bibiliya?

 

Iyo nzu yerekana ibyifuzo by’Imana; igomba kuvuga ikuzo ryo mw’ijuru, iry’umurwa wa zahabu n’irya Yerusalemu nshya. Erega mu Baheburayo 9.23 – 24 havuga ko ibikoresho byo muri ubwo buturo byashushanyaga ibyo mw’ijuru. Icyo ijuru ryerekezaho, umutima waryo ni iki? Ubutunzi bwose n’ikuzo ryose bikubiye muri Umwe utangaje: Umwana w’Imana, Nyagasani Yesu Kristo. Niwe uri hagati y’ibyo Imana yibwira byose. Uko niko byahoze kuva iteka ryose kuzageza ku rindi, kandi ibyo tubimenya iyo dushakashatse mu Byanditswe byera. Nta kundi byagenda: tubasha kubona Uwo Mwana w’Imana dufashe iyo nzu mu mubumbe wayo cyangwa muri buri cyose kiyigize.

Bibiliya ni igitabo cy’Imana. Imana yahumekeye ubwenge bwayo mu bantu, abamenyesha ibyo bagomba kwandika. Uko niko Ibyanditswe Byera byatugezeho. Rugikubita, mu gitabo cya kabiri cya Bibiliya cyitwa Kuva duhita tubonamo uko ubuturo bw’Imana bwagombaga kuba buri. Ntabwo ari imvugo y’amagambo akakaye, ni ayumvikana afite ubuzima muri yo. Ni icyaremwe cyerekana ukwibwira k’Umuremyi. Aha byose bifite insobanuro tubasha gushaka no kubona mu Byanditswe Byera. Kuko byisobanura byonyine.

Gahunda

Bityo rero ntabwo iyo nzu yagombaga kugira umuteguro nk’uw’abantu.Yagombaga kubakwa kuko Imana yabyifuzaga: “Kandi bandemere ubuturo bwera, nture hagati muri bo” (Kuva 25.8). Imana ubwayo niyo yahaye Mose icyitegererezo ubwo yamaranye nawe iminsi mirongo ine ku musozi wa Sinayi (Kuva 24.28). Niyo mpamvu, ubwo iyo nzu yubakwaga ijambo “uko Uwiteka yategetse Mose” (Kuva 39 na 40) rigaruka kenshi. Yagombaga kuba uko nta muntu n’umwe yabitekereza.

Imbonerahamwe

Mureke rero tujye kureba! Tukiri kure nta kindi tubona uretse urugo rw’imyenda wera, ku burebure bwa mikono 100 n’ubugari bwa mikono 50, rukaba rufashwe n’inkigi zikomeye (Kuva 27.9-12). Umukono w’Abaheburayo wangana hafi na santimetero 50. Ubwo rero twavuga ko ahari hazitiye (urugo) hanganaga na metero 50 kuri 25.

Washoboraga kureba igisenge cy’inzu nyirizina kirenga hejuru y’urugo: iyo nzu yari ifite ubujyejuru bwa mikono 10. Ntabwo icyo gisenge cyari gifite amabara meza ngo kibe cyaryohera ijisho. Ariko niko mu by’Imana byose biri, nta kinezeza abantu kibibamo! Utari winjira ngo abane n’Imana nta cyo yumva cyangwa ngo amenye yaba kuby’amagambo y’Imana n’ibyayo byose. Kuri we ni ubusazi! Niko Bibiliya ibivuga neza murwa 1 Abakorinto 1.18 na 23. Abantu ntibigeze bagira icyo babona cyihariye muri Nyagasani Yesu Kristo, Umwana w’Imana. Byose byari bibahishwe, ntacyabakururaga na kimwe. “Ntiyari afite ishusho nziza cyangwa igikundiro… yasuzugurwaga nk’umuntu abandi bima amaso natwe ntitumwubahe” (Yesaya 53.2-3). Inararibonye y’uwizera wese imwereka ibyo; ahambere ntacyari muri Kristo Yesu cyankururaga, nyamara ubwo namaze kumwemera, ahora ari umunyacyubahiro kandi asumba byose.

Umuryango ubuzanyijwe Kuva 27.9-18

Iyo twegereye, rwa rugo ruradutangaza. Ni imyenda yera cyane, irabagirana, itandukanye n’amabara yandi yijimye arukikije. Ruhita rwunvisha ukwera no gutungana kw’imbere yarwo. Kandi ubujyejuru ni rurerure: metero 2 n’igice. Ntawaruhagarara inyuma ngo arungurukemo. Ntabwo Imana yiyerekana!

Iyo myenda miremire yera irasa nivuga ngo: Birabujijwe kwinjira! Ibi si ibyoroshye: mu bisanzwe nta muntu ubasha kwegera Imana. Umuntu umwe gusa niwe wari uwera muri we kurusha ukwera kw’iyo myenda ikingirije aho. Uwo ni Kristo; yabaye Uwera rwose, akiranuka. Iyo ureba urwo rugo rwera, wibaza niba nawe uri uwera. Ese nawe uri umwe muri iyo myenda yera?

Hari benshi bifuza gukurikira Yesu Kristo. Bisa nk’aho ari byiza cyane. Ariko icyambere Imana ishaka kutwigisha kuri iyi nzu, kuri uru rugo, nuko twebwe abatuye mu mahema yijimye, mw’isi yanduye, dutandukanye cyane no kwera kwayo. Ntabwo rero tubasha kwegera Imana dutyo, ko tutabasha guhagararana na Kristo no kumukurikira. Kwera kwe, kutagira icyaha muri we, byerekana neza uko twebwe turi abanduye imbere.

Twe abantu turanduye rwose kandi turi abanyabyaha. “Nta wukiranuka n’umwe… Bariganishije indimi zabo… Kubaha Imana ntikuri imbere yabo… kuko bose bakoze ibyaha ntibashyikira ubwiza bw’Imana” Soma Abaroma 3.10-23. Tugomba kubanza kwemera ibyo. Ese urashaka nawe kuba umunyakuri ubanza kwemera ugukiranirwa kwawe, maze ugasanga Imana no kugorama kwawe, nta buryarya, uko uri kose? Niba wemera, NONEHO HARIHO umuryango ujya ku Mana waguteguriwe. Mu ruhande rwerekeye iburengerazuba, hariho umuryango wagenewe umunyabyaha, ni umuryango ukinguye!

Umuryango

Kuva 27.16

Mbega umuryango mugari kandi mwiza! Kubw’ibyaha byacu, Imana yagombaga kuvuga iti: “abantu bose bagume hanze, mu mwijima w’iteka. Bose bagomba kurimbuka.” Ariko noneho haboneka igitangaza cy’ubuntu bw’Imana: yashyizeho umuryango. Ni kuri buri wese. Nibwo Butumwa bwiza, Inkuru y’agakiza. Mbega umuryango!

  1. Umurayango ni mugari: ni mikono 20 cyangwa se metero 10.

 

Ntabwo imiryango migari nk’iyo ikunze kuboneka. Urukundo rw’Imana rwashyizeho umuryango mugari nk’uwo kubw’abashaka kwinjira bose. Imana yashatse kwerekana ko kwijira ari umudendezo wa bose. Imana ni Umukiza wifuza ko bose bakizwa (1 Timoteo 2.4-5). Ushaka wese aze (Ibyahishuwe 22.17).

2. Ni umuryango mwiza ufite amabara ane:…Uko niko umuryango winjira muri iyo wagaragaraga. Ayo mabara atubwira ibya Nyagasani Yesu Kristo. Tuzabigarukaho hanyuma.

3. Kuwunyuramo biroroshye: Ntabwo ari umuryango ucuze mu cyuma cyangwa ubaje mu giti. Ni umwenda uhakingirije wa mikono 20 y’ubugari kuri 5 y’ubujyejuru. N’umwana muto abasha kwinjira. Abato n’abakuze BARARARITSWE.

4. Hari umuryango umwe gusa. Nyagasani Yesu ubwe niwe watanze insobanuro z’uwo muryango akiri hano mw’isi, ubwo yagiraga ati: “NI JYE REMBO, umuntu niyinjira muri jye, azakizwa” (Yohana 10.9). Kubwe tubasha kwegera Data (Abefeso 2.18; 3.12). Niwe Mukiza wenyine. Bitandukanye nuko bamwe bavuga ngo: Erega buri wese afite uko yakijijwe! “Kuko hariho Iman imwe, kandi hariho Umuhuza umwe w’Imana n’abantu” (1 Timoteo 2.5). Niwe ubasha kutugeza munzu y’Imana, ntawundi.

 

Umuryango ukinze

Ariko Bibiliya itubwira ko hari igihe umuryango uzakingwa. Umuryango w’agakiza wakinzwe mu gihe cy’inkuge ya Nowa, nk’uko tubisoma mu Itangiriro 7.16 -23. Abatarinjiye mu nkuge, bose bahitanywe n’umwuzure. Umuryango wakinzwe mu gihe hatashywe ubukwe, nk’uko tubisoma muri Matayo 25.1-10. Ba bakobwa batanu bashatse kwinjira nabo mu bukwe, ariko basanze igihe cyahise.

Hariho rero uburyo bubiri gusa: imbere munzu cyangwa hanze.

Imbere munzu: warakijijwe, ufite umwanya mu bukwe, kandi ni iby’igihe cy’iteka ryose.

Hanze: uciriweho iteka, uri uwo mu mwijima mu gihe cy’iteka ryose. Erega ni amahitamo hagati y’ubugingo no gucirwaho iteka, nirwo rupfu rwa kabiri! Ni ikinyuranyo hagati y’umucyo n’umwijima. Winjiriye muri Nyagasani Yesu Kristo, cyangwa se uri hanze. Umuryango ubasha gukingwa mu kanya gato: urugero ni nko mu gihe upfuye. Urupfu ruza rudateguje. Ese aho rwaba ari uruza nonaha? Ubundi kandi – nabwo ni ibiza vuba bidatinze, bidateguje - ni ukuza kwa Nyagasani!

Icyo gihe nikigera utariwinjira, bizakubera impitagihe kubw’iteka ryose. Banza ubitekerezeho: uzaba usigaye inyuma y’umuryango iteka ryose!

Hanze hazaba amarira no guhekenya amenyo; hazaho kwivuma ngo: iyaba nari nahise ninjira ubwo nasomaga ka gatabo IKAZE MUNZU Y’IMANA!

Ese uri mu ruhande ruhe? Imbere mu rugo? Hanze?

Muri ayo magambo yombi, ubasha gusiba irihe? Ese ufite umudendezo wo gusubiza mu manyakuri? Erega umuryango uracyakinguye. Kristo aracyahari ategereje arambuye amaboko yo kukwakira. Niwe uvuga ati: “Nimuze munsange, muzane n’ibyaha byanyu. NIMUZE!”

Igicaniro

Hari umugabo uza wegera, ni uwo mu bwoko bw’Abisiraheri. Uwo muntu urabona adatekanye. Ahagaritse umutima. Afite intama akurura inyuma ye, irimo ikiziriko. Ese azanywe n’iki? Afite ubwoba; atinya Imana. Yaracumuye, none icyaha cye kiramurega; umutimanama we nta mahwemo umuha. Hari icyo azi kuri iyo Mana yera cyane ituye muri iyo nzu ya zahabu yerekejeho.

Ese icyamubera cyiza ni uko yahungira kure ateye iyo nzu umugongo? Oya, Imana se wayisha he? Kuba atekereza kuri iyo Mana ikiranuka byonyine, biramubuza umutekano, agahinda umushyitsi.

Mu rugo

Wa mugabo yegera imbere. Araza akikira mu ruhande rw’amajyaruguru y’amahema yera yubatse urugo. Uwo mucyo wayo uramukora ku mutima. Ashyitse mu ruhande rw’iburasirazuba. Aho ari arareba noneho irembo rikinguye bisesuye. Aherako yinjira atazuyaje.

Nguwo ageze mu rugo rugari. Yitegeye ya nzu y’ubwiza butavugwa; niyo nzu y’Imana. Iratumbagira hejuru kuko ifite mikono 10 y’ubutumburuke, nizo metero 5 zose. Izuba riratwika, arabyumvira ku mucanga agendamo. Ariyumva ahagaze mu maso y’Imana. Arumva amaso y’Imana acengera akarenga imyenda yambaye maze ikabona ibiri mu mutima we!

Dore noneho hari umutambyi uje amusanganira. Aramubaza ati:

Ese nakumarira iki?

 

Wa mugabo asubizanya ubwoba ati:

Naracumuye… buriya… Imana igomba… kumpana…

Nibyo rwose. Ariko noneho ubu uri ahakwiye. Imana yateguye ibi byose kubera umunyabyaha; ntabwo yabikoreye abantu bibwira ko ari beza.

 

Igicaniro n’igitambo

Ngwino, nkurikira tujyane.

 

Nuko yibona ageze imbere y’igikoresho cyambere cyo mu buturo: igicaniro kinini cy’umuringa gikongorerwaho ibitambo. Ijambo igicaniro risobanura ko ari ahantu ho gutambira ibitambo. Aho habagirwa ibitambo ibihumbi n’ibihumbi kandi bikahakongorerwa. Bibiliya igenda itwereka ubusobanuro bw’igicaniro n’igitambo: bivuga Kristo n’igikorwa cye cyo gukiza cyo ku musaraba. Ihuriro by’ibitekerezo by’Imana ni aho kandi nirwo rufatiro rw’agakiza k’abanyabyaha. Igicaniro n’ibihumbi byinshi by’ibitambo byakinyuzeho bivuga igitambo cya Kristo n’umurimo we utanga agakiza wo  ku musaraba.

Kuva iteka kugeza iteka ryose umusaraba w’Umukiza niryo huriro ry’isi n’ijuru.

Umuteguro w’Imana

Imana yamenye kuva mbere hose uko bizagendekera ibyaremwe. Yari azi neza umugambi wa sekibi ko ari ukwangiza ibyo Imana yakoze byose: Ntabwo ari ibyaremwe gusa, ahubwo n’ubugingo bw’abantu bose maze amaherezo yabo akaba ayo kurimbuka iteka ryose. Kuva kera cyane mu gihe cy’iteka ryose, Imana yari ifite umuteguro mu mutima wayo: uwo gukirisha abantu. Ibyo byabashaga kumenywa n’Imana ubwayo. Ni Imana yera itabasha kurebera icyaha itagihannye; ntibasha kucyirengagiza. “Imana ni UMUCYO” (1 Yohana 1.5). Igomba guhanisha gukiranuka kwayo abantu bose. Nonese niba ari uko ibigenza, ibasha ite kwerekana urukundo rwayo?

“Imana ni URUKUNDO” (1 Yohana 4.8.16). Nuko yateguye uyu mugambi: Umwana w’Imana ubwe azaza hano mw’isi ari umuntu kugira ngo apfe mumwanya w’abanyabyaha…

Buri gicaniro, buri gitambo cyatanzwe mu gihe cy’Isezerano rya kera,kivuga Umwana ukundwa w’Imana uzaza umunsi umwe hano kw’isi kugira ngo ababazwe kandi apfire ku musaraba.

Gupfa mu mwanya wa…

Nuko umutambyi yegera wa mugabo agira ati:

Ndabona waje witwaje igitambo!

Yego, narinzi ko ari ngombwa. Ariko se ni ngombwa koko ngo iri tungo ryicwe?

Nta kabuza, kuko iyo nta maraso amenetse hatabaho kubabarirwa ibyaha (Abaheburayo 9.22).

Nonese ko iyi ntama nta cyaha yakoze! Uzi uko abana banjye bayikunda? Nta kibi yakoze rwose.

Uko ni ukuri. Umugizi wa nabi ntabasha gucungura undi munyabyaha.Icyaha cyawe cyashyize ubugingo bwawe mu kaga. Ubu ugomba gupfa: yaba wowe cyangwa ugucungura w’umuziranenge.

 

Ngaho rero rambika ibiganza ku mutwe w’intama. Bityo uraba wemeje ko uri umunyabyaha naho intama ko nta cyaha ifite. Icyo gikorwa imbere y’Imana gisobanura ko ubaye umwe n’itungo ryenda kwicwa mu mwanya wawe. Intama niyo ihindutse kuba yarakoze icyaha. Ubwo intama ipfa, uhita nawe uba uw’umudendezo n’umuziranenge nk’uko yahoze iri mbere.

Nuko wa mugabo ahita arambika ibiganza bye kuri ya ntama. Hakurikiraho imyiteguro runaka… inkota… nuko amaraso y’intama ameneka ku musenyi w’ubutayu. Mbega uko biteye ubwoba! Nyamara dore wa mugabo uko yiruhutsa! Yubura amaso areba mw’ijuru… ni nkaho umutwaro uremereye cyane umuvuye ku bitugu… Intama ipfuye mu mwanya we. Nuko arababarirwa. (Abalewi 4).

Yewe Mana we, ndagushima cyane!

Wemeye kwicwa nk’ Intama, Yesu,

Ku bw’ ibyaha byacu, wowe Mukiza.

Mbeg’urukundo, mbeg’ ineza nyinshi!

Wapfuye kugira ng’ udukize.

Mu gih’ ugukiranirwa kwacu

Kwagutey’ imibabar’ itavugwa,

Urupfu rwawe rwaratubohoye:

Uturonker’ ubuntu n’ihirwe.

Nyagasan’ ububasha n’ ikuzo,

Ubwiz’ ubweng’ubwami n’ibya Yesu!

Guhera ubu mu mitima tuti:

“Ubahwa Mucunguz’ ukomeye”!

(Indilimbo ya 35)

Wowe se?

Nyemerera mbaze ikibazo kimwe: wowe usoma iyi mirongo, waba umusore cyangwa ukuze, waba warageze hafi cyane, mu bitekerezo byawe, ku musaraba? Uwera w’Umuziranenge yagezweho n’imibabaro itavugwa, arapfa…

Abantu batabarika ntacyo uwo musaraba ubabwiye. Bakomeza kwiberaho nk’ibisanzwe, umunsi ku wundi, bari mu byaha byabo cyangwa ari inyangamugayo, badahuguza, ariko ntawabapfiriye. Bakomeza batyo kugeza ubwo bazagera mu kurimbuka kw’iteka. Hari abandi babyumvanye inyota nyinshi bakorwa ku mutima, icyakora ntibishyikirije Imana kubwabo kimwe n’uriya Mwisiraheri.

Kristo yapfiriye abantu bose bashyize ibiganza byabo kuri ya ntama: ni Kristo Ntama w’Imana. Nawe ubasha kubikora. Ubasha kwifata neza imbere y’uwamanitswe ku musaraba maze ukamubwira uti: Njye naracumuye, ninjye wari ukwiriye kugerwaho n’urwo rubanza; Nyagsani Yesu, dore ni wowe wampfiriye.

Noneho werekeze hejuru mw’ijuru ugira uti: Ndagushimira Mana Data, ndizeye; niringiye igikorwa cy’Umwana wawe yarangirije ku musaraba. Nyagasani Yesu, ndagushimiye.

Kuva ako kanya, Imana ibabarira ibyaha wakoze byose kubw’amaraso ya Nyagasani Yesu.

Nuko uhinduka uw’umudendezo kubw’igihe cy’iteka ryose.

Wabay’ ikivume ku bwacu,

O Mukiza!

Warababaye bikomeye,

O Mukiza!

Wamenny’ amaraso ku bwacu,

Atwezaho ibyaha byose...

Tubeshwaho n’ urupfu rwawe,

Yesu Mwiza!

(Indilimbo ya 39.2)

Ibipimo by’igicaniro

Umutambyi afashe ya ntama yerekeza ku gicaniro. Ubwo nibwo wa mugabo yabashije kukibona neza.

Mbega uko cya gicaniro ari kigari! Gifite mikono 5 mu burebure na mikono 5 mu butambike. Ntabwo ibyo bipimo ari gusa. Muri Bibiliya, umubare gatanu werekeza ku nshingano. Amategeko aha umuntu inshingano 5 ku Mana n’izindi 5 ku muntu mugenzi we (Kuva 20). Dufite kuri buri kirenge amano 5 no kuri buri kiganza intoke 5. Ese ibiganza byanjye nabikoresheje iki? Ni ibyiza gusa? Igihe cyose? Mfite inshingano imbere y’Imana mu migenzereze no mu migendere yanjye. Ibirenge byanjye se byanjyanye he? Ni hahandi gusa Imana ishaka kumbona? Dufite ibyumviro 5. Ese twabikoresheje dukorera Imana? Mu byo tuzabazwa n’Imana byose twagiye ducumura kuri buri tegeko binyuze mu maboko yacu yombi n’ibirenge byacu byombi. Nta numwe wasohoje ugushaka kose kw’Imana.Twese, hatavuyemo n’umwe, twacumuye ku mategeko y’Imana; kabone twaba twarabikoze mu bitekerezo gusa. Ubyemeye wese abasha gusanga igicaniro cy’Imana, ku musaraba. Ahongaho hari wawundi wabayeho hano mw’isi yumvira amategeko y’Imana yose, ni wawundi ushyitse rwose: Umuntu Kristo Yesu. Nicyo gituma abasha gusohoza umurimo wo kuba umuhuza no gutura Imana igitambo.

Igicaniro cyari gifite impande 4. Hariho ibihe 4 (Kuva 8.22); ibyerekezo 4 ku pera y’isi (Yesaya 11.12). Muri Bibiliya, umubare 4 n’uw’isi. Bityo twabonye amabara 4 ku muryango nk’uko dufite ubutumwa bwiza 4 bubwira isi ibya  Nyagasani Yesu, Umukiza waje mw’isi kubwa bose.

Yaritanze aba impongano kubwa bose (1 Timoteo 2.6). Ubishaka wese abasha gukizwa.

Ese uzi agaciro k’amaraso yeza?

Akuraho ibyaha byawe iteka?

Uzi ko agutsindishiriza akuzanira,

Amahoro?

Akira imbabazi, agakiza n’ubugingo;

Bibonerwa mu kwizera amaraso ye.

Hano mu isi umukurikire mu nzira

Iboneye.

(Indilimbo ya 260.3.5)

Ubujyejuru bw’igicaniro ni mikono 3. Tuzi ko Ubumana burimo batatu: Imana Data, Umwana na Mwuka Wera. Ese abo uko ari batatu hari icyo bahuriyeho ku gicaniro, ku gikorwa cyo kutwunga n’Imana? Yego rwose! Kuko Ubumana bwose bwarakoze ubwo igikorwa cyo gukiza umuntu cyahagurutswaga:

Data yatanze Umwana we (Yohana 3.16).

Umwana yaritanze we ubwe (Abagalatiya 2.20).

Yitanze mu mbaraga za Mwuka w‘iteka (Abaheburayo 9.14).

 

Muri uyu murongo wanyuma Ubutatu bwose buravugwa: Kristo, UMWANA, yitambiye Imana, DATA, kubwa MWUKA w’iteka.

Ibikoze igicaniro: ibiti

Igicaniro cyagombaga kuba gikoze mu giti cy’umushita. Ni igiti cyameraga mu butayu. Nyagasani yakuriye imbere y’Imana ari nk’umushibuka, nk’umuzi uva mu butaka bwumagaye. (Yesaya 53.2; 11.1).

Mu gishushanyo cy’igiti tubonamo ubumuntu bwa Yesu. Igiti kiva mu butaka. Dusoma ko Nyagasani Yesu yabyawe n’umugore (Abagalatiya 4.4). Muri Yesaya 4.2 yitwa “imyaka yo mu gihugu”.

Ntagushidikanya ko Umwana w’Imana Yesu Kristo yari Imana nyakuri kandi ubugingo buhoraho (reba 1 Yohana 5.20). Ntitugomba kwibagirwaibyo kandi azahora iteka ari we. Nyamara nubwo yari kandi na none akaba ari Imana ihoraho, yaraje mu rukundo n’ubuntu butagira iherezo, agera kw’isi kandi aba Umuntu wuzuye.

Ni kuki se yicishije bugufi kandi ari Imana Umuremyi ushobora byose? Kwari ukugira ngo ababazwe ndetse apfe nk’uko tubisoma mu Abaheburayo 2.17. Nk’Imana ntiyabashaga gupfa. Ariko yafashe umubiri urimo amaraso, asa na bene se muri byose… kugira ngo abe impongano y’ibyaha by’abantu. Yagombaga kuba umuntu ngo abashe guhanwa n’urubanza rw’Imana mu cyimbo cyacu. Mu ntege nkeya arabambwa (2 Abakorinto 13.4); ibyo nibyo ibiti bikoze igicaniro bivuga.

Umuringa

Imbaho zikoze igicaniro zari ziyagirijweho umuringa: niyo mpamvu igicaniro kimena amaso kirabagirana ku zuba! Umuringa ni ikimenyetso cy’imbaraga.

Reba nko muri Yobu 40.13. Byongeye kandi: ni ikimenyetso cy’imbaraga zibasha kwihanganira umuriro w’urubanza rw’Imana. Dufite gihamya mu Kubara 16 ahavugwa imyivumbagatanyo. Hariho abagabo 250 bashakaga gutamba ibitambo kandi batabyemerewe; abo bose bakongowe n’umuriro w’urubanza rw’Imana (imirongo 35-39).

Ariko rero tuhabona ikidasanzwe: ibyotezo bicuzwe mu muringa bari bitwaje byanyuze nabyo muri uwo muriro ariko ntacyo wabitwaye. Ba bagabo 250 bose barakongotse, bashiraho. Ibyotezo byabo byose ntacyo byabaye: byari bifite muri byo imbaraga zo kunyura muri uwo muriro w’urubanza rw’Imana bitagize icyo biba. Uwo muringa ukomoka kuri ibyo byotezo niwo wari uyagirijwe ku gicaniro.

Ese ninde wari ufite imbaraga zo kugibwaho urubanza rw’Imana? Nta muntu numwe cyangwa umumarayika numwe. Keretse Ukiranuka wenyine, niwe Mwana w’Imana.

Mbega Umuntu! Mbega Umukiza!

Yari Umuntu – igiti

Yari Imana – umuringa.

Niwe wenyine wabashaga gutanga igitambo: niwe wenyine washoboraga gusohoza igikorwa cyo gucungurwa, cyari gitegerejwe mu myaka 4000, kandi cyari gihagije kwegereza abantu bazimiye Imana, ngo yeze kandi asubize mu mwanya ukwiye ibyaremwe byose.

Hashize imyaka mike abashakashatsi bavumbuye umuryango w’igiti (imbaho), utwikiriye umuringa, ufatanyije neza. Byagaragaye ko udashobora gutwikwa n’umuriro. Uwo muryango woherejwe i Londoni ku babishinzwe ngo babigenzure. Basanga nta muriro ubasha kuwutwika maze ushyirwaho ikimenyetso cyanditsweho ngo: Ntubasha gukongoka. Aha rero tubona ko ibya Bibiliya bigaragaje ko ari ukuri kandi byakozwe mbere y’ubuhanga bukoreshwa ubu.

Urushundura, umuriro, amahembe y’igicaniro

Umuriro uraka mu gicaniro.

Mu cyakabiri cy’ubujyejuru bw’igicaniro hariho urushundura rushyirwaho inkwi.

Umuriro ugurumanaho wacanwe n’Imana ubwayo (Abalewi 9.24).

N’ubundi wa mugabo yongera kugira ubwoba ubwo umutambyi yashyiraga intama ku muriro.

Mbega ikibatsi! Imana ni umuriro ukongora: niko tubisoma mu Baheburayo 21

12.29

Wa Mwisiraheri arebana amarangamutima ya ntama igurumana.

Intama mu cyimbo cye…

Narinkwiriye kujya mu rubanza. Ariko Kristo yabambwe ku musaraba, ari munsi y’umujinya ugurumana w’Imana. Mbega uko yashaririwe! Yahinduwe kuba icyaha ngo tube ugukiranuka kw’Imana muri we (2 Abakorinto 5.21). Yatereranywe n’Imana mu gihe cya ya masaha atatu y’umwijima ukomeye (Matayo 27.46). Aho hakwiriye ishimwe no kuramya bucece.

Tumaze kureba urwo rukundo n’icyo gikorwa cyuzujwe, dusobanukirwa neza ko nta mbabazi kandi ku muntu wese ukerensheje umusaraba wa Kristo; ko uwariwe wese utemeye icyo gitambo ategereza inyanja y’umuriro w’iteka.

Wa mugabo asubira inyumaho gato.

Yitegera ibitangaje bihebuje.

Dore cya gicaniro kinini gikongorerwaho ibitambo… indimi z’umuriro zirashabira… umwotsi urazamuka ugana mw’ijuru… dore n’amahembe ane y’igicaniro… aminjangiweho amaraso… yerekeje mw’ijuru…

Wagira ngo igicaniro gitegeye Imana amaboko…

Ni nkaho igicaniro gishyikiriza Imana igitambo!

Bityo rero igicaniro gikongoreweho igitambo ni igishushanya Nyagasani Yesu Kristo. Nk’uko tubona igicaniro gishyikiriza Imana igitambo, niko Kristo yitambye ubwe ku Mana. Icyo nicyo cyahaye agaciro igitambo cye: uwo Muntu utangaje yazanye igitambo. Uko niko tugomba kumva Matayo 23.19: igicaniro kiruta igitambo kuko cyeza igishyizweho.

Kristo ni byose: ni igicaniro, ni igitambo. Ndetse ni umutambyi uzamura igitambo ku Mana agikongora mu muriro. Yaritanze we ubwe.

Umusaraba ntabwo usobanura gusa agakiza ku munyabyaha. Hariho ikindi gikomeye kandi gitangaje kijyana n’umusaraba: Umwana w’Imana yiyeguriye Data.

Umwana w’Imana yitanza ubwe ku bwacu. Ni ukuri, ariko mbere ya byose yabanje yiyegurira Imana. Imana yari yarasuzugujwe n’icyaha, none Yesu arashaka guha Imana icyubahiro. Yaritanze ku bushake bwe ngo yubahishe Imana ageza ku gupfa.

Muri icyo gihe Imana nk’IMANA yahishe uruhanga rwayo uwari uhindutse icyaha, indoro y’Imana nka DATA yari yuzuye urukundo iri ku Mwana wayo. Yivugira ko igituma Data amukunda, nuko yemera guhara ubugingo bwe (Yohana 10.17).

Nta kiruhuko

Wa Mwisiraheri yiruhutsa bimuvuye ku mutima. Ibyaha bye byose byakuweho. Abasha gusohoka akingendera mu mahoro.

Ariko dore ahagaritse bitunguranye umutambyi:

Ubu se kandi ejo ninongera ngakora icyaha bizagenda bite?

Uzongera uzane ikindi gitambo cy’ihene cyangwa intama cyangwa se kandi inuma ebyiri.

Icyumweru gikurikiyeho ninongera…

Uko niko bizakomeza gusaba ikindi gitambo! Ahangaha ntabwo ndangiza umurimo wanjye. Aho wabonye ko nta ntebe n’imwe iri hano?

 

Dore koko mu rugo ntaho kuruhukira; no munzu ubwayo ntahantu wabona hateganyirijwe kwicara cyangwa kuruhukira. Nta narimwe mbasha kwicara iyo ndi hano. Ntabwo ndangiza umurimo wanjye, bityo nta kiruhuko.

Ibisobanuro tubibona mu Baheburayo 10.11 aho dusoma aya magambo: ”Kandi umutambyi wese ahagarara iminsi yose akora umurimo we, atamba kenshi ibitambo bidahinduka…”

Ese ni kuki atabashaga kuruhukira aho mw’ihema aho akorera umurimo we? Impamvu nuko ari mw’Isezerano rya kera, mbere yo kubambwa kwa Yesu. Umurimo ukomeye wo gucungura wari utarasohozwa. Bityo ntabwo byashobokaga kubona ikiruhuko.

Hazanywe kandi hicirwa amatungo atagira ingano. Dufashe urugero rwo mu 1 Abami 8.63, dusoma ko amapfizi 22.000 n’intama 120.000 byabazwe ubwo batahaga urusengero rwa Salomo. Nyamara ntabwo ibyo bitambo byose byabashaga kubabarira icyaha kimwe! (Abaheburayo 10.4), “Erega ntibishoboka ko amaraso y’amapfizi n’ay’ihene akuraho ibyaha”. Yego ibyaha byarababariwe mw’Isezerano rya kera, tumaze kubibona kuri uriya Mwisiraheri. Dawudi nawe avuga muri Zaburi ya 32 ati: “Hahirwa uwababariwe ibicumuro bye, ibyaha bye bigatwikirwa”. Ariko:

 

  1. Byari kubw’igihe gito, kuko iyo bongeraga gukora icyaha hagombaga ikindi gitambo.
  2. Byari agateganyo hategerejwe Intama nyakuri yagombaga gutambwa rimwe rihagije iteka ku musaraba (Abaroma 3.25).

 

Nta kiruhuko: ibitambo bishya byazanwaga buri gihe, nta kibibuza. Byatangaga iki? Ongera usome Abaheburayo 10.11. Bityo nta ntebe yabonekaga mw’ihema.

Ijwi ry’ibyishimo

None Umukiza n’Umucunguzi yazanye ikinyuranyo. Ariko we…! Ariko we, Nyagasani Yesu… Niko avugwa mw’Isezerano rishya. Nyuma y’umusaraba, intumwa igira iti: Ariko uyu niwe…

Yaritanze ubwe nuko aturonkera gucungurwa kw’iteka (Abaheburayo 9.12).

None abonetse rimwe gusa kugira ngo akuzeho ibyaha kwitamba (Abaheburayo 9.26).

Ubu noneho yicaye iburyo bw’Imana iteka ryose (Abaheburayo 10.12).

Kera, umutambyi wo mw’isi -Ubu, Umutambyi wo mw’ijuru

Kera, igitambo cy’itungo -Ubu, Ntama w’Imana

Kera, ibitambo byinshi Ubu,- igitambo kimwe

Kera, ibitambo bisubirwamo -Ubu, igitambo kidasubirwamo

Kera, nta kiruhuko -Ubu, ni ikiruhuko

Kera, ntibyarangiraga -Ubu, birahagije iteka ryose

Kera, nta cyaha cyakurwagaho -Ubu, twejejwe n’igitambo cye

Kera, imbabazi z’igihe gito -Ubu, rimwe rihagije iteka ryose.

Kuruhuka gukwiye

Nyagasani Yesu yaricaye; araruhuka. Yinjiye mu kiruhuko cye (Abaheburayo 4.10).

Nyuma y’amasaha atatu y’imibabaro itarondorwa yamaze ku musaraba, yararanguruye ati: BIRARANGIYE!

Byose byarasohojwe. Ntagisigaye kandi. Birahagije kumusanga. Kuza nk’umunyabyaha wo kurimbuka. Kuza uri uko uri; ukarambika ikiganza ku gitambo. Kwemera ibyaha no kubyatura. Icyo ni uguhindukira no kwanga ibyaha. Ariko nitwatura ibyaha byacu niyo yo kwizerwa kandi ikiranukira kutubabarira ibyaha byacu, no kutwezaho gukiranirwa kose (1 Yohani 1.9). Birakwiye kumwizera. Noneho birakwiye kumushimira kubwo gucungurwa kwasohojwe!

Uwarugenewe kurimbuka, mu mubabaro mwinshi,

Abona icyaha gikuweho na Yesu.

Kubwo gutanga icyiru gikwiriye

Yarababajwe. Birasohojwe.

Aho waba uzi uwaruhutse birushijeho? Ni Imana Data. Imana yarishimye bihagije nuko iruhukira mu murimo Umwana we yasohoje ku musaraba. Ubasha nawe kuruka utyo muri icyo gitambo Imana yaruhukiyemo.

Duhuje umutima turamy’ Imana Data;

Nyagasani yicay’ ahera kubwacu:

Nyuma y’imibabaro yicaye mu ikuzo,

Niyo mahoro yuzuye y’intama ze.

(Indilimbo ya 59.4)25

Ubwo bidatinze ko abacunguwe bagera iyo mw’ijuru, ntabwo bazaba bakitekerezaho. Ntibibakwiye, ahubwo bararirimba bati:

Umwana w’intama watambwe

ni we ukwiriye guhabwa ubutware

n’ubutunzi n’ubwenge

n’imbaraga no guhimbazwa

n’icyubahiro n’ishimwe!

(Ibyahishuwe 5.9-12)

Igikirabiro

Kuva 30.17-21

    Yewe mutambyi, reka nkwibarize: Uriya mugabo ndeba ni kuki akaraba ibiganza n’ibirenge abyitayeho?

  Ni uko nawe ari umutambyi; ubasha kubimenyera ku myambaro ye no ku mukandara w’amabara akenyeje. Agomba kwiyeza ngo abone kwinjira ahera. Ibyo ntabwo wowe bikureba: kwinjira ahera ntabwo ubyemerewe, uri Umwisirayeri wo muri rubanda. Ndetse n’Abalewi ntabwo biriya ari ibyabo kuko ari abafasha b’abatambyi. Umurimo wabo ni ugukorera hanze y’ihema no kwikorera ibikoresho byaryo.

 

Abatambyi bonyine nibo bafite kwinjira ahera; nibo bana n’abakomoka kuri Aroni, umutambyi mukuru.

Erega abatambyi bahora bitera ibizinga. Nyamara Imana ni iyera cyane ku buryo itegeko ritajenjetse:bagomba guhora baza kwiyeza ku gikarabiro. Niba atari ibyo, ntibabasha gukorera Imana ari abera!

Abatambyi bonyine

Uko niko byari bimeze mu gihe cya kera.

Kuri uwo Mwisiraheri wo muri rubanda ntacyo igikarabiro cyari kimubwiye. Ntiyabashaga kujya aharenze igicaniro. Ariko ku mutambyi we, igikarabiro cyari icy’ingenzi: yagombaga kukigeraho iminsi yose.

Ariko rero wehoho usoma iyi mirongo, menya ko ari ikintu gikomeye kuri wowe. Ariko ibyo birasaba ko waba waremeye kwakira igitambo cyagutangiwe. Abacyakiriye bose Imana s’ukubuhagira abakuraho ibyaha gusa, ahubwo yanabahinduye kuba abatambyi. Mu Byahishuwe 1.5 dusoma ko Nyagasani Yesu akunda abe kandi yabahinduye kuba abatambyi b’Imana ariyo Se.

Mu gihe cya none hariho ubutambyi rusange rw’abizera bose. Ntabwo mw’isezerano rishya hariho ibyiciro bitandukanye: abatambyi n’abandi (abalayiki).

Intumwa Petero abwira abo yandikiraga ati: Muri ubutambyi bwera, bwo gutura ibitambo byo mu buryo bwa mwuka… ubutambyi by’ubwami bwo kwamamaza ishimwe rye (1 Petero 2.5,9).

Koza ibirenge

Ese bigenda bite ngo abizera benshi babe badafite ubushizi bw’amanga bwo guhamya ko bakijijwe? Nyamara batuye rwose ko ari abanyabyaha bo gucirwaho iteka. Bageze ku gicaniro, niho ku musaraba, kandi barambika ibiganza byabo ku gitambo. Bagize ibihe byo kumenya no kwizera ko amaraso ya Yesu Kristo, Umwana w’Imana, yeza kandi agakuraho icyaha cyose (1 Yohana1.7). Ndetse birashoboka ko bashimiye Imana ugucungurwa kwabonetse. Rwose uko gishima ni ukw’ingenzi kuko kwemera no gushimira bijyana (Yohana 1. 12-13; Abakolosayi 1.12)

Ariko nyuma y’aho bahita bongera kwibona mw’icuraburindi. N’agahinda kenshi, bongera kwibona bagicumura. Bongera kwibona mw’ishusho yo hambere batarahindukira. Ese iryo hindukira ryabayeho koko? Nuko ugushidikanya kukabataha.

Gukizwa rimwe – kubohorwa kw’iteka

Ese ni uguhora umuntu yihana, ahindukira? Guhora usaba bundi bushya kugirana amahoro n’Imana kubw’amaraso? Kugwa no kubyuka bigahora bisimburana? Guhora mu kujijinganya iteka?

Oya, ntabwo ibyo ari ko biri mu gutekereza kw’Imana.

Hari icyo umuntu aba atarasobanukirwa. Ishingiro y’ibyo ni uko haba hatariho gusobanukirwa neza iby’igicaniro n’umusaraba.

Igicaniro kibwira utizera:

Igikirabiro kigatangariza uwizera

Uri umunyabyaha

Kubw’imibabaro n’urupfu rwa Kristo ku musaraba, umurimo wose warasohoye.

Amaraso ye akuraho ibyaha byose by’abatura kandi bakizera Kristo.

Agaciro k’umurimo wa Kristo ni ak’iteka ryose.

Ni ibidasubirwamo ukundi.

Uri umwana w’Imana.

Ariko birashoboka ko wakongera kwanduzwa n’icyaha.

Ibyo bizinga bikurwaho no kwatura ibyaha byakozwe.

Kristo ni umuvugizi wacu kuri Data. Atwoza ibirenge kubw’amazi y’ijambo rye. Ni ibihora bisubirwamo.

 

Amazi areza

Munzira yo kwerekeza mw’ihema ry’Imana, igikarabiro ni igikoresho cya kabiri umutambyi ahura nacyo. Cyahoraga cyuzuye amazi. Ese ubundi amazi mu Byanditswe asobanura iki?

Abefeso 5.26: Yeza itorero aryuhagiza amazi y’Ijambo.

Yohana 15.3: Muri abera kubw’ijambo nababwiye.

Turabona rero ko amazi ashushanya imbaraga zeza umuntu zivuye mw’ijambo ry’Imana.

Amaraso n’amazi

Kristo amaze gupfa, umusirikare amutobora urubavu akoresheje icumu, havamo amaraso n’amazi (Yohana 19.37).

Amaraso avuga gucungurwa, amazi akavuga kwezwa (1 Yohana 5.6).

Amaraso yo gucungurwa akora umurimo mu gihe cyo guhindukira.

Nyuma y’ibyo, igikorwa cyo kwezwa gihoraho, nicyo gishushanywa n’amazi yo mu gikarabiro.

Ubwo twamenya ugucungurwa maze tukishyira mu kwezwa kwa buri gihe binyuze mu mazi y’ijambo ry’Imana ibituzanira gushidikanya byose byo mu buzima bwacu bwo kwizera birahunga.

Kuba muri We no kubana Nawe

Abantu bo mu Burasirazuba nta nkweto zipfutse hose cyangwa amasogisi bambaraga; uretse gusa udukweto duciye bugufi tw’amasandare. Bityo rero, amaguru yabo yanduraga vuba, cyane cyane iyo ubushyuhe bwatosaga amaguru yabo. Tunamenye ko inzira zabo zarimo umukungugu mwinshi kurusha uko iz’iwacu zimeze! Ntabwo byari byemewe kuza kwirambura ku ntebe ndende zari zikikije ameza ufite amaguru yanduye. Hariho rero umuhango wo kuhagira abatumirwa ibirenge mbere yo kujya gufungura (Luka 7.36-50).

Araye aribufatwe, ubwo abigishwa barimo bajya impaka zo kumenya umukuru muri bo ari nde, Nyagasani Yesu yabuhagiye ibirenge. Yigize Umugaragu wabo. Kuri Petero kwari ugukabya, ariko Umwigisha niko kumubwira ati: “Nintakoza ntacyo tuzaba duhuriyeho” (Yohana 13.8).

Dore icyo bivuga: kubana nawe. Ntabwo kuhagirwa ibirenge bibaho ngo ubone kuba muri we! Ibyo bihabwa iyo ugeze ku gicaniro, ku musaraba. Ariko mu mibereho yacu ya buri munsi, tugomba gukomera ku ruhare dufitanye, ku bumwe, ku mushyikirano.

Kuhagirwa ibirenge

Icyo ni igihora kigarura uwizeye ku rukarabiro, niryo jambo ry’Imana. Ibirenge by’unyura mu butayu bihora byandura igihe cyose. Bityo uwizera wese ahora aterwa ibizinga n’ikibi – naho twaba tutagambiriye gukora icyaha – kuko twumva kandi tukareba ibyo mw’isi. Ibyo byanduza imibereho yacu kandi tugaterwa ibizinga. Nubwo byaba atari ibyaha runaka bizwi mu mazina, tugomba buri gihe kugaruka ku gikarabiro kwezwa.

Udukarabya ibirenge ninde? Yewe, wagirango ntibishoboka: ni Nyagasani Yesu ubwe. Akorera mu be kubw’amazi, niyo jambo rye. Ni mugihe turisoma cyangwa turyumva. Rifite imbaraga zihishura ibibi twakoze. Ibyanditswe byera biratunganye kandi birasesuye ku buryo akenshi duhita twibona; tugahita dutangara tuti: ariko iki cyangwa kiriya ntikiri mu mwanya wacyo muri jye! Bityo Nyagasani atujyana aho duca bugufi, tukicuza kandi tukihana icyaha. Iyo twemeye ikibi twarimo, tukacyanga, duhita tukibabarirwa. Tuba uwizeye wongeye kwezwa. Ni Nyagasani Yesu ukora ibyo muri twe kuko niwe Murengezi wacu kuri Data. Muri 1 Yohana 2.1-2, harabanza hakavuga ngo: “Bana banjye bato, mbandikiriye ibyo kugira ngo mudakora icyaha”. Dore rero icyo Data ashaka ku bana be. Ariko azi ko mu mikorere yabo bigenda ukundi incuro nyinshi; nicyo gituma ahita avuga ati: “Icyakora nihagira umuntu ukora icyaha” (ahari izuba ntirirarenga kuko) “dufite Umurengezi kuri Data wa twese, ariwe, Yesu Kristo ukiranuka”.

 

Kwatura ni ryari?

Hari incuti zaganiraga ku byo kwuhagirwa ibirenge. Uwambere ati: Njye buri wagatandatu mfite akamenyero ko kwiyibutsa ibyambyeho byose bitagenze neza mu minsi ishize. Mbyaturira Imana maze nkabona gutangirana umunsi wambere w’icyumweru ibyishimo byinshi. Ariko undi nawe yari afite iki gitekerezo, agira ati: Oya, njye ntabwo mbikora buri wagatandatu, ahubwo ni buri mugoroba mbere yo kuryama. Uwagatatu nawe yari amenyereye ibikurikira: Buri uko nkoze cyangwa mvuze ikibi, mpita ncyaturira Imana; mbikora vuba bishoboka. Naho yaba ari igitekerezo kibi kinyuze mu mutima wanjye, ngicira urubanza maze nkacyirukana mu mutima wanjye. Mbese ninde muri abo batatu ukurikiza ugushaka kwa Nyagasani, kandi akamushakira inyungu?

Umwana

Iyo umwana usuzuguye umubyeyi we, yaba se cyangwa nyina, akomeza kuba umwana we. Kubw’uko yamubyaye, akomeza kuba umwana we, nta nakimwe cyabihundura cyangwa cyabikuraho. Nyamara umwana wacumuyentabasha kunezererwa mu busabane na se. Habaho intera hagati yabo. Niko bigenda iyo uwizera yacumuye. Akomeza kuba umwana w’Imana, ariko wacumuye. Ntabwo akomeza kunezerwa, nta mudendezo wo gusenga agira, nta gushyira hamwe na se aba afite. Kugira ngo bongere kugirana ubusabane, agomba kwatura icyaha cye, akacyemera. Icyo gihe ntabwo aza asanga se nk’umunyabyaha wo gucirwaho iteka, ahubwo amusanga nk’umwana kuri se.

Icyo nicyo gisobanuro cy’igikarabiro: gifite rero akamaro gakomeye cyane mu mibereho y’umukristo. Kimushishikariza kugenda uko bikwiye, kugira ngo adateza agahinda Umukiza na Se. Buri gihe yaguye nyuma agakomerezwa mu buntu, agirana n’Umucunguzi umunezero no gusabana bishya mu buryo butavugwa.

Umugaragu iteka ryose

Mwene data, mushiki wanjye, uramenye ntuvaneho ibirenge byawe! Reka byuhagirwe. Hora ugaruka mu mwiherero wo mu cyumba cyawe ngo usubirane ubusabane mugirana! Iyo utabikoze, umutera agahinda. Erega menya ko – tubivuganye icyubahiro cyinshi – ntabwo anezerwa iyo utari hafi ye…! Mukingurire cyane umutima wawe. Mwemerere awukuremo ikintu cyose kibangamira amahoro yawe. Wemera kubingeza utyo? Ubwo rero ubugingo bwawe buzuzurirana imbaraga, umugisha mwinshi, n’imbuto nyinshi kubwe!

Mbega uko urukundo rw’Umukiza ari rurerure bitangaje! Erega kuhagira ibirenge ntabwo ari ikgikorwa kinejeje. Nyamara ahora abisubiramo. Hano kw’isi yamwe ari Umugaragu wa bose. Ubu n’ubundi aracyadukorera.

Aradusabira, atubereyeho. Hariho igihe kuhagira ibirenge azabihagarika, ubwo tuzaba turi hafi ye, mu butungane bwose. Nyamara n’icyo gihe azakomeza adukorere: iyo mw’ijuru naho azakorera abe, kuzageza igihe cy’iteka ryose. Reba muri Luka 12.37. Uko Kristo ari kose, ni kubw’abamwizeye!

Ingero z’uburebure

Nta ngero z’uburebure zitangwa ku gikarabiro. Ese ni kubw’ubuntu butabasha kugereranywa bugenda bweza umukristo mu rugendo rwe? Biteye agahinda ko kenshi usanga umukristo agenda abonekwaho no gutana ndetse n’ibyaha. Ariko Imana yitegura buri gihe kutwezaho imyanda yose iyo tuyaturiye; nuko akadusubiza mu mwanya wacu. Urukundo rwe ntabwo rufite iherezo.

Indorerwamo z’abagore

Ese ubundi umuringa wari waracuzwemo igikarabiro wari waravuye he? Mu Kuva 38.8 dusoma ko cyari cyaravuye mu ndorerwamo z’abagore. Bari baratanze indorerwamo zabo kubw’umurimo w’Imana. Ntabwo muri icyo gihe ibirahuri byariho; nicyo gituma indorerwamo zavaga mu muringa usennye cyane. Izo ndorerwamo zari zifite murimo ki? Abagore bazirebagamo. Ariko icyo bakoreshaga bishimisha ubwabo baragitanze ngo gikore ibyiza kurushaho: batanze indorerwamo zabo, baziha Imana, barazishongesha ngo bazicuremo igikoresho cy’ingirakamaro cyo munzu y’Imana. Mu by’ukuri cyakomeje kuba nk’indorerwamo, ariko noneho yo kwicira urubanza no kurushaho kwibonamo intege nke. Kuko mw’ijambo ry’Imana, rishushanywa n’amazi, tubasha kwiyinira, kwirebamo, tukimenya. Amakosa twibonaho tukabasha noneho kuyakuraho, tukiyeza. Abagore batanze indorerwamo zabo zari zicuzwe mu muringa kubw’inzu y’Imana. Ese twebwe haba hari icyo twatanze, tukagiha Imana? Imana yaduhaye impano n’ubushobozi. Ese aho ntitubyigumanira ubwacu? Ese koko turabiyikoreshereza? Niba tubikoresha kubwayo, nayo izatugira ikintu cyiza kiyishimisha. Icyo uyihaye, iragicura, ikagiha ishusho, ikacyereza kuyihimbaza no kuyiha ishimwe!

Ibyitegererezo

Abanyabugeni benshi bamaze kugerageza kubaka igishushanyo gito cy’ihema. Babikoze bakurikije ibikoresho n’ingero zivugwa mu Kuva 25 kugeza 40.

Icyitegererezo mubona amashusho yacyo muri aka gatabo cyatunganyijwe hakurikijwe urugero rwa 1:25 n’abahanga batandukanye, buri wese mu gice cye. Bakurikije kandi amabwiriza ya bwana Paul F. Kiene wo mu Busuwisi. Munzu yo kumurikiramo ibya Bibiliya mu mugi wa Amsterdam hari icyitegererezo kinini cyatunganyijwe n’umugabo wubahaga Imana, bwana Schouten. Muri ibyo byitegererezo byombi hakoreshejwe zahabu nyakuri.

Iyo ugereranyije ibyo byitegererezo byombi usanga haboneka itandukaniro rito. Twafata urugero ku gikarabiro: ntawe uzi uko cyari gikoze, ndetse n’abamalaika ku ntebe y’ihongerero ntawe uzi uko bari bakiriho. Ibyo biterwa nuko dufite uko ibyanditswe bibivuga nyamara nta shusho yabyo dufite. Ntabwo Musa yari akeneye ishusho: Imana yari yamweretse byose kuri wa musozi (Kuva 24). Ubundi kuri twe, Imana yanze kutubwira ibitadufitiye umumaro mu buryo bw’insobanuro za mwuka zose, idusigira gusa ibikwiriye byo kutumenyesha ukwifuza kwe kuri twe.

Imbaho z’imiganda

Kuva 26.15-30

Ese ubundi iyo nzu yari yubakishije iki? – Mu biti, bibajwemo imbaho nini z’imiganda. Buri rubaho rwareshyaga na mikono 10 y’uburebure (metero 5) na 1.5 mu mubyimba. Zose hamwe zari 48. Nk’uko twabibonye ku gicaniro, zari mu giti cy’umushita. Icyo giti cyumburira mu butaka, cyavugaga Nyagasani Yesu ko ari Umuntu nyawe, wavukiye kw’isi.

Zahabu

Icyakora izo mbaho zose zari ziyagirijweho zahabu. Birunvikana ko hakoreshejwe zahabu nyinshi cyane kuri icyo gikorwa. Mu muteguro w’Imana, bari barazihagurukanye, hamwe n’ibindi by’agaciro kenshi, ubwo bavaga mu Egiputa. (Kuva 12.35-36). Mbega uko muri iyo nzu harimo umucyo n’ubwiza: ibirimo byose ni zahabu gusa. Muri Bibiliya yose tugenda tubonamo iryo buye ry’agaciro gakomeye. Bihera muri Edeni uko tubisoma mw’Itangiriro 2. Mu bihe byose zahabu yagiye iba ibuye rishakishwa na bose. No mu Byahishuwe 21, ahavugwa Yerusalemu nshya, tuhabona zahabu itagira uko ingana. Uwo mugi utatse ubwiza bw’Imana uzaba uwa zahabu nziza, ndetse n’umuhanda uzaba ari uwa zahabu itavanze. Zahabu ivuga ijuru, ikuzo ry’Imana.

Imbaho z’imiganda zisobanura ubumuntu bwa Kristo, naho zahabu ikavuga ikuzo ry’ubumana bwe. Uko niko yagendaga hano mu’isi: yari Imana kandi ari n’umuntu icyarimwe. Imana yiyerekanye yambaye umubiri (1 Timoteyo 3.16). Abantu babonye mbere ya byose ubumuntu bwe: abandi bake niko babashije kubona zahabu yo muri we, ubumana bwe. Kuri Data, ni ikinyuranyo cy’abantu: nk’uko za mbaho z’imiganda zabonekega, yabonaga mbere nambere zahabu, nibwo bumana bw’Umwana we, ariko kandi Data yaramurondoraga akanamubonamo ubumuntu bwuzuye. Umukristo nawe ni uko aboneka. Ni umuntu hano kw’isi, agaragara nk’urubaho. Nyamara mu by’ukuri ayagirijweho zahabu. Yego ni iyobera, ariko Bibiliya ivuga ko uwizera wese, umwana w’Imana wese, yambaye ugukiranuka kw’Imana (2 Abakorinto 5.21). Kimwe na wa mwana w’ikirara wo muri Luka 15 wambitswe na se ikanzu nziza, uwizera wese abasha kuvuga ati: “Nzajya nishimira Uwiteka cyane, umutima wanjye uzajya unezererwa Imana kuko yanyambitse imyambaro y’agakiza” (Yesaya 61.10). Nk’uko zahabu yari itwikiriye imbaho, uwizera “ari muri Kristo”, bivuga ko yambaye ubwiza bwo mw’ijuru (2 Abakorinto 12.2).

Imana yari muri Kristo

Mu gihe cy’Abisiraheri, izo mbaho ziyagirijweho zahabu zari inkuta y’ubwo buturo bw’Imana. Aho niho Imana yari ituye. Hanyuma y’icyo gihe, Umwana w’Imana yaje hano mu isi. Imana rero yatuye muri we, muri Nyagasani Yesu. “Kuko Imana yashimye ko kuzura kwayo kose (Ubumana) kuba muri we” (Abakolosayi 1.19).

Atuye mu wizera wese

Ubwo Kristo yasubiye mw’ijuru, uwizera wese ni inzu, ni urusengero rutuwemo n’Imana Mwuka Wera. “Mbese ntimuzi yuko imibiri yanyu ari insengero z’Umwuka Wera uri muri mwe, uwo mufite wavuye ku Mana?...” (1 Abakorinto 6.19).

Atuye mw’Itorero

Izo mbaho z’imiganda zose zari zegeranye ku buryo ari zo zari zubatse inzu y’Imana hano mw’isi. Bityo na none haracyariho ubuturo bw’Imana: icyifuzo cye ni uko abizera bose bo mw’isi bakoze inzu yishimira kubamo. Ntabwo igituye mu nzu yubakishijwe zahabu cyangwa mu rusengerorukomeye rw’amabuye nka rurya rwa Salomo. Inzu y’Imana ni Itorero ry’Imana Ihoraho nk’uko tubisoma mu 1 Timoteyo 3.15. Kandi Abefeso 2.22 haragira hati: “Mwebwe abizera “murubakanwa kugira ngo mube inzu yo kubabwamo n’Imana mu Mwuka”. Mbega uko ari iby’ingenzi! Uwandikiye Abaheburayo nawe ati: “Iyo nzu yayo ni twe” (3.6). Abo bizera bo mw’Isezerano rishya, nk’uko n’uyu munsi biri, nibo bari inzu y’Imana Abana nyakuri b’Imana bose nibo Torero rya Kristo, nk’uko Petero abivuga mu rwandiko rwe rwambere igice cya 2, ni “amabuye mazima ngo babe inzu ya Mwuka n’ubwoko bw’abatambyi bwera”.

Nyamara birashoboka

Mbega uko biteye agahinda kubona mu gihe cya none abizera bategeranye nk’uko za mbaho zari zegeranye! Ahubwo hari ugutandukana no kwicamo ibice. Ubwo Itorero ryari rimaze kuvuka, ubumwe bwariho, buboneka. Abakorinto barabwiwe bati: “muri urusengero rw’Imana Ihoraho, nk’uko Imana yabivuze iti: Nzatura muri bo…” (2 Abakorinto 6.16).

Nyamara rero birashoboka ko twakumva mu mitima yacu ubumwe bw’abizera by’ukuri bose, ibigaragaza ko abana b’Imana bose ari bamwe. Kandi birashoboka ko twaterana ku rufatiro rw’ubumwe. Ibyo byabaho no kugenderwamo uyu munsi. Ese uwatanze amabwiriza yose yo gukorera Imana mu gihe cy’Abisiraheri ntabasha none guha abana be arebana no kuramya? Nibyo rwose arabikora! Hehe? – Ntahandi uretse mu Ijambo rye. Iyo dukurikije iryo Jambo maze tukitandukanya n’abatizera (2 Abakorinto 6.17) maze tugafatanya n’abamabaza Imana bafite imitima itaryarya (2 Timoteyo 2.19-22), tubasha guterana mw’izina rya Nyagasani Yesu.

Guterana mw’izina rye, bisobanura: tumukikije. Nyagasani Yesu niwe uba hagati; afite ubuyobozi n’ubutware; niwe wenyine ugomba kuyobora. Ababigenza batyo bafite isezerano ryo muri Matayo 18.20: abari hagati.

Ese imbaho z’imiganda zari zitaruye zimwe ku zindi? Kuva 26.26-29

Ashwi da! Nk’uko imijishi inyura mu bikondo by’ingobyi, hariho imbumbe enye zanyuraga mu mpeta za zahabu zigafata za mbaho, zikaguma hamwe zegeranye.Mu Byakozwe n’intumwa 2 ubwo Itorero ryari rivutse, hariho ibintu bine byatumaga abizera baguma hamwe begeranye mu bumwe.

Ku murongo wa 42, havuga ko “bahoraga bashishikariye ibyo intumwa zigishaga bagasangira ibyabo,

no kumanyura umutsima

no gusenga”.

Noneho hariho n’undi mubumbe, ikumbo, utabonekega inyuma, wanyuraga imbere mu mbaho. Uvuga uby’urukundo niwo “murunga wo gutungana rwose” (Abakolosayi 3.14).

Imyobo Kuva 26.19-25

Urufatiro rw’inzu rwagombaga kuba rukomeye rwose kuko iyo nzu yari yubatse hejuru y’umusenyi wo mu butayu. Erega urufatiro rw’inzu iyo ariyo yose rugomba kuba rukomeye! Umwubatsi ukomeye, Imana, yateganyije ko urufatiro rw’inzu rugomba kuba ari imyobo minini icuze muri feza: umwobo umwe wari ufite uburemere bwa kg 40. Munsi ya buri rubaho rw’umuganda hariho imyobo ibiri ya feza. Urubaho rwari rusatuyemo kabiri ku mpera yo hasi kugira ngo haboneke uburyo bwo kurushinga mu myobo ibiri. Mbega urufatiro rw’igiciro!

Ifeza Kuva 30.11-16; 38.25-28

Iyo feza yose yavuye he? Imana yari yarategetse Musa gukora ibarura ry’abantu, abagabo bose, kuva ku myaka 20 kugeza 50. Umuntu wese wabarurwaga n’Imana, yagombaga kwishyura ikiguzi cyiswe incungu y’ubugingo bwe. Icyo kiguzi cyari kimwe kuri bose, umukire kimwe n’umukene yagombaga gutanga igice cya kabiri cya shekeli ya feza. Uko niko byakomeje kugeza uyu munsi: umuntu abarwa mu bwoko bw’Imana nyakuri, mw’Itorero rya Nyagasani Yesu Kristo, iyo hatanzwe ikiguzi gicungura ubugingo.

Imyobo yo kuri ya nzu yari yaracuzwe muri iyo fezayatanzwe. Kuri buri rubaho rwo muri zazindi 48, imyobo ibiri ya feza. Inzu yose muri rusange, na buri wese ku mwihariko, urufatiro ni feza yatanzweho incungu y’ubugingo. Muri Bibiliya yose, dusanga ko ifeza ikoreshwa nk’uburyo bwo kwishyura.

Aburahamu yaguze isambu ya shekeli za feza 400. Yozefu, akiri umusore yaguzwe ibice bya feza 20. Naho Yuda yagurishije shebuja ibice bya feza 30. Hariho indimi, nk’igiheburayo n’igifaransa, zikoresha ijambo rimwe zivuga ibuye ry’agaciro n’ifaranga. Ifeza muri Bibiliya ni igishushanyo cy’igiciro Kristo yishyuye ngo abe impongano: amaraso ye y’igiciro cyinshi.

Bityo rero inzu y’Imana, kugeza ubu, ibasha gukomera, ishingiye ku ncungu yatanzwe, nicyo giciro gikomeye Umucunguzi yishyuye ngo tubone impongano y’ibyaha. Uko niko ibitekerezo by’Imana biri, niwe ubwe wabashaga kubigira maze yishimira kubimenyekanisha binyuze kuri iyi nzu nziza ya zahabu. Ntitwaguzwe na zahabu cyangwa feza, ahubwo twaguzwe n’amaraso y’igiciro cyinshi ya Kristo, nk’ay’umwana w’intama utagira inenge cyangwa ikizinga (1 Petero 1.18-19).

Inkingi y’igicu

Hejuru y’ubuturo aharinganiye n’ahari hateretswe Isanduku habonekega igicu. Yari inkingi y’igicu igaragaza ko Imana iri aho. Iyo nkingi niyo yayoboraga ubwoko bw’Imana (Kuva 40.36-38). Iyo igicu cyaterurwaga kuri ubwo buturo, bahitaga bahaguruka, bazinze byose nk’uko amabwiriza yo mu Kubara 4 ari. Abantu bose bagombaga guhaguruka bakitegura urugendo. Bakagenda berekeje he? Mu cyerekezo Imana yaberekaga ikoresheje igicu. Imana niyo yari Umuyobozi wabo. Bagombaga kugarukira he? Kugeza aho igicu cyahagararaga. Byose byagombaga kubakwa maze igicu kikongera kuza ku buturo. Mu Kubara 9.15-23, dufite inkuru nziza y’ibyo. Ongera urebe na 10.33-36.

Twebwe se? Ntidufite iyo nkingi y’igicu. Nyamara dufite Umuyobozi mwiza muri iki gihe umukristo agendagenda mu butayu bw’iyi si. Ntabwo afite igicu kiboneka ahubwo ni Mwuka Wera utuye muri twe abizera. Abantu bose bagannye Imana n’ibyaha byabo byose maze bakizera Nyagasani Yesu Kristo bafite uwo Mushyitsi mwiza utuye muri bo (Abefeso 1.13; 1 Abakorinto 6.19). Umwuka Wera ayobora uwizera iyo yemeye kugengwa no gusenga. Uvuga ati: “Ntabwo namenya aho kunyura, Nyagasani, nyobora, mbera umuyobozi!”- uwo ntazabura kuyoborwa nawe no kurindwa gusitara kose. “Nzakwigisha nkwereke inzira unyura, nzakugira inama, ijisho ryanjye rizakugumaho” (Zaburi 32.8).

Amabara ane

Ibiboshywe byose byo muri iyo nzu byarimo aya mabara uko ari ane:

igitare

umuhengeri

umukara wa kabayonga

umuhemba

 

Reka turebere hafi ayo mabara icyo asobanura twifashishije Ijambo ry’Imana. Turabona rero – kandi ntakundi byagenda – ko atwigisha byinshi kuri Nyagasani Yesu. Ikuzo rye ni ryinshi, nuko rero tubona impande zitandukanye z’ubwiza bwaryo.

Imana Data iramuzi neza (Matayo 11.27). Nuko binezeza Data kwereka abana be ibikungahariye mu Mwana we ukundwa.

Mu butumwa bwiza uko ari bune, Nyagasani Yesu avugwa mu mashusho atandukanye.

Ayo mashusho niko tuyabona avugwa muri ayo mabara ane agize ibiboshywe byo mu buturo.

Igitare gicyeye

Ibara ryambere ni igitare gicyeye. Rivuga ubuziranenge no gukiranuka. Ibuka ya ntebe nini ya cyami y’umweru (Ibyahishuwe 20); igitare cyiza, kirabagirana, kitanduye; niyo mirimo yo gukiranuka y’abera mu Byahishuwe 19.8.

Hano muri izi nyegamo zo muri iyi nzu, igitare ni igishushanyo cy’ubuziranenge bwa Kristo. Muri iryo bara ry’igitare cyiza tubonamo imibereho izira amakemwa kandi itunganye yagendeyemo iteka kubwa Se no gukorera abantu. Yabaye Umuntu wuzuye n’Umugaragu w’indahemuka.

By’umwihariko, mu butumwa bwiza bwa Mariko niho yerekanwa atyo.

Umukara wa kabayonga (ubururu)

Ntabwo bigoye gusobanukirwa iryo bara ry’umukara wa kabayonga cyangwa ubururu. Biraguhagije kubura amaso ukereba kw’ijuru! Kristo yitwa Nyagasani wavuye mw’ijuru (1 Abakorinto 15.47), Nyagasani w’icyubahiro (Abakorinto 2.8). No mu gihe yagendaga hano mu isi, ni Uwavuye mw’ijuru (Yohana 3.13), ni Uri mw’ijuru (Yohana 3.13). Yabaye umuntu, nyamara akomeza kuba Umwana w’Imana. “Yesu Kristo, Iyo niyo Mana y’ukuri n’ubugingo buhoraho” (1 Yohana 5.20).

Mu butumwa bwiza bwa Yohana tumumenya ari Imana Mwana.

Umuhengeri

Uwo mwambaro wari uw’igiciro cyane ku buryo wambarwaga gusa n’abami n’abakire bakomeye. Kandi tubona ko mu Byanditswe uyu mwambaro uvugwa gusa mu bihugu by’amahanga bitari Isiraheri, cyane cyane mu ngoro z’abategetse isi mu gihe cya cyera.

Umuhengeri ujyana n’ubukire bwo mw’isi. Iryo bara rijyanye na Yesu mu buryo bw’uko ari Umwana w’umuntu nk’uko tubibona muri Zaburi ya 8, aho byose bishyizwe munsi y’ibirenge bye.

Uko niko yerekanwa muri Luka: Umwana w’umuntu, ariko binyuze mu mibabaro n’urupfu, Nyagasani utwara abakomeye, n’Umwami w’abami.

Umuhemba

Binyuranye n’umuhengeri, uko tubibona mu Byanditswe byera, ibara ry’umuhemba rivugwa bijyanye na Isiraheri. Naryo ni ibara ry’igiciro.

Kristo azagira ugukomera n’icyubahiro cy’Umwami wa Isiraheri. Muri Matayo 27.28 niho tumubona yambaye umwenda w’umuhemba.

Ubutumwa bwiza bwa Matayo nibwo bugaragaza ubwami bwe kuri Isiraheri.

Kandi ikindi tubona ni uko yaba kw’ibara ry’umukara wa kabayonga (ubururu) cyangwa se umutuku (umuhengeri) n’umuhemba hasabwa kwica udusimba twinshi dutanga ayo mabara: ubwo rero muri ayo mabara harimo ibivuga urupfu…

Imiryango itatu

Umuryango w’urugo kw’irembo niwo wambere. Iyo warengaga iyo nyegamo washyikiraga mu rugo.

Umuryango wa kabiri ni uwinjira Ahera. Iyo nyegamo yanyurwagamo n’abatambyi bonyine bajya gukora umurimo wabo.

Umuryango wa gatatu ni wa mwenda wari ukingirije Ahera cyane. N’abatambyi ubwabo ntibatinyukaga kwinjirayo. Umutambyi mukuru wenyine niwe washoboraga kwinjira, kandi rimwe gusa mu mwaka wose: kuri wa munsi mukuru w’impongano.

Iyo miryango, ikozwe mu biboshywe, yarimo ya mabara tuzi. Umwenda ukinze Ahera cyane niwo wiyongeragamo amashusho y’abakerubi. Icyo byerekanaga: ibyo biremwa bitangaje byarindaga ukwera kw’Imana.

Hirya y’uwo mwenda hari hateretse isanduku, aho Imana ituye.

Inyegamo yambere, ariwo muryango wo kw’irembo, yari mikono 20 y’ubugari, mikono 5 y’ubujyejuru. Imyenda yombi, ku miryango 2 y’ubuturo nyirizina, yari mikono 10 kuri 10. Uwo kw’irembo biraboneka ko  wari mugari cyane, mu gihe iyi yindi yombi yari ifunganye ariko

ubujyejuru ari harehare. Reka turebe niba ibyo nabyo bifite icyo bisobanuye.

Kwinjira kuri bose

Ku muryango wambere, Imana iratumira abanyabyaha bose, kandi ni byiza ko benshi baza. Begera ubwo igicaniro, ni ku musaraba w’Umucunguzi, bagakizwa. Barishima kubw’iteka ryose.

Nk’uko twabibonye tuvuga iby’igikarabiro, babaye abatambyi kuva ubwo. Kubwa none, mu gihe cy’Isezerano rishya, babasha kwinjira bakagera kure: kugeza ahantu ho mw’ijuru.

Ikibabaje ni uko benshi bahera hanze! Ese basanga iyo nyegamo ifunganye cyane, cyangwa se ari nini, cyangwa se ubundi ari ndende cyane? Bagira ubwoba bwo kwinjira? Bagombye kugera kure no kurushaho kumenya ibyiza binezeza by’aho, ariko ntibabigenza batyo. Mbega agahinda! Bagombye gutera intambwe kuyindi binjira munzu ya zahabu.

Ese twagombye gutegereza kwinjira mw’ijuru wa munsi tuzavanwa hano mw’isi?

Tukiri mu mubiri, uwizera wese afite umugisha wo kwegera no gutura ibitambo by’ishimwe no kuramya, kuko ari umutambyi, ubu muri kano kanya afite uburenganzira bwo gukora ibyo abatambyi ba kera bari babujijwe: ashobora kurenga umuryango wa gatatu, akinjira Ahera cyane, akegera intebe y’ubuntu y’Imana.

Ubwo nyagasani yapfiraga ku musaraba, umwenda ugabanya Ahera n’Ahera cyane waratabutse. Imana ubwayo niyo yabikoze. Nta gikoresho cy’umuntu cyabigizemo uruhare: utabuka uhereye hejuru kugeza hasi. Bityo urupfu rwa Nyagasani rukingura inzira yo kujya mu bwiza bw’Imana. Dufite umudendezo wo kujya Ahera cyane – tunyuze mu mwenda watabutse… (Abaheburayo 10.19-20). Mwene data, mushiki wanjye, ibyo warabihawe, ni ibyawe. Bikoreshe ufite umudendezo wose!

Ntama w’ Imana Krist’ araca,

Abambwe;

Umwend’utabuka ako kanya,

Abambwe.

Hakinguw’ahera cyane,

Tubasha kweger’ Imana

Kubwawe Yesu witanze,

Ubambwe.

Indilimbo ya 43.143

Imyenda yo gusakara

Imbaho z’imiganda n’inkingi imyenda ikingiriza imiryango yaridendetseho nibyo twakwita igikanka cy’iyo nzu. Hariho imyenda minini yo gusakara yari idendetse hejuru y’icyo gikanka. Ni isakaro ryatumaga imiyaga n’ibyo hanze bitiroha munzu.

Uwahagararaga Ahera cyangwa Ahera cyane maze akereba hejuru… yatangariraga ibya areba! Ni nk’aho areba mw’ijuru ubwaryo. Yitegerezaga umwenda uhebuje usakaye iyo nzu, w’amabara ane kandi utatse abakerubi. Ni nkaho yakabwiwe ati: Aha ni ubuturo bw’Uwera! Uwo ni umwenda w’imbere cyane muri yayindi ine isakaye iyo nzu. Wanganaga na mikono 40 kuri 28. Hejuru yawo hari undi wa kabiri, uboshywe mu bwoya bw’ihene. Wanganaga na mikono 44 kuri 30; wari munini kurusha uwambere.Witwaga “ihema… hejuru y’ubuturo”. Uyu wari utwikiriye uwambere, ukawurinda, ariko kandi wanarindaga inyubako yose. Mu buryo by’igishushanyo, iyo myenda itwikira, ariko cyane cyane uyu wa kabiri, isobanura kwitandukanya. Bivuga rero ko inzu y’Imana – abizera ba none – yashyizwe ku ruhande, yatandukanijwe n’isi n’ibitaboneye byose imbere y’Imana.

Twirinde tumenya ko kwitandukanya atari ukuba abakagashe cyane imbere y’abatizera, ahubwo ni twebwe ubwacu imbere y’ikibi.

Kristo yabigendeyemo uko bigomba ubwo yari hano mw’isi.

Abafatanyabikorwa

Kuva 31.1-11

Byasabye ubuhanga n’ubumemyi ngo imirimo y’iyo nzu ikorwe neza. Gutunganya ibiti, gushongesha amabuye y’agaciro, gukora ibikoresho…

Abagabo babiri Imana yahaye guhagararira iyo mirimo kandi bahawe ubushobozi ni Besaleli (izina rye risobanura: Mu gicucu cy’Imana) na Oholiyabu (Data niwe hema ryanjye). Muri Bibiliya tubona akenshi ubusobanuro bw’izina bufitanye isano na nyiraryo. Tubasha rero guhamya ko babanaga mu bumwe n’Imana igihe cyose. Kuri Besaleli turasoma ngo: “Namwujuje Umwuka w’Imana” (Kuva 31.3).

Oholiyabu siwe wenyine wamufashaga: reba umurongo wa 6: “Kandi mu mitima y’abahanga bose nashyizemo ubwenge ngo bakore ibyo nagutegetse byose”. Uyu munsi ushobora kureka Imana ikakuzuza Umwuka wayo(Abefeso 5.18) ndetse no gusaba ubwenge (Yakobo1.5) kugira ngo ubone gufatanya mu bwubatsi bw’inzu y’Imana hano kw’isi (1 Abakorinto 3.10-15). Buri Mwisiraheri wese yashoboraga kugira icyo azana, ibikoresho cyangwa impano, ngo abashe gufatanya muri ubwo bwubatsi(Kuva 25.1- 9; 35.20-24). Tubasha gukora ibirenzeho: twamuha ibyo dutunze ndetse tukamwiha ubwacu.Ibyo nta gahato ahubwo ku bushake bwacu.Arabikwiye incuro ibihumbi.Ndetse tuzi ko ibyo twizirikaho byenda gusigara inyuma, tukabita iteka ryose. Icyo tumuhaye ni inyungu kandi ni icy’iteka ryose.

Abagore

Ese ninde bande batunganyije ibiboshywe byose? Mbega uko byari umurimo uremereye! Abagore nibo bakoze uwo murimo utoroshye.

Ntabwo umugore yabashaga gukora umurimo uwo ariwo wose urebana n’ubutambyi aho muri iyo nzu, cyangwa se undi urebana n’uw’Abalewi. Nyamara Imana yageneye intoke zabo umurimo udasuzuguritse: gutegura ibiboshywe byo hanze y’iyo nyubako.

Ese siko bigenda n’uyu munsi? Abagore bizera bafite umurimo mwiza, inshingano yihariye, yo kwita ku byambika ubwoko bw’Imana, ubwo ituyemo.

Ibyo ntibigarukira gusa ku buryo baboneka imbere y’abantu, ahubwo ndetse bita no ku mirayango yabo. Ibyo bitangirana n’abana babo bakiri bato, babatoza kwambara ibikwiriye. Mbere ya byose mu byo bambara n’uko baboneka imbere y’abantu, abana babikomora kuri ba nyina; ariko noneho umugore agira uruhare mu mwifatire y’umugabo: niwe utuma umuryango

wose uboneka ko ugendera mu migambi y’Imana. Mbega umurimo mwiza w’umugore ukomeza kuboha mu rukundo ibyo umuryango w’Imana wambara: niryo Torero!

Uko abagore muri Isiraheri batunganyaga ibiboshywe bivuga ikuzo rya Kristo, mushiki wacu muri Kristo abasha, binyuze mu migendere ye, uko aboneka imbere y’abandi, mu magambo ye, uko atuma abandi bamererwa, kugaragaza icyo Nyagasani Yesu aricyo kuri we.

Ahera

Ni bikoresho ki byari Ahera?

Igitereko cy’amatabaza

Ameza y’imitsima imurikwa

Igicaniro cy’imibavu.

 

Igitereko cy’amatabaza

Kuva 25.31-40

Icyo mbona mbere yabyose aho munzu ni iki?

Umucyo, igitereko cy’amatabaza. Kristo yari umucyo w’isi (Yohana 9.5). Igitereko cy’amatabaza cyari muri zahabu itavanze, yavanywe muri talanto imwe kandi yanyuze mu maboko y’umucuzi wa zahabu w’umuhanga. Iyo zahabu itavanze yari yarakubiswe… irakubitwa… Uwari umucyo nyakuri yari yarababajwe, yarakubiswe ndetse yarahanywe bikomeye n’Imana.

Igitereko cy’amatabaza cyari kimwe hamwe n’amashami yacyo atandatu. Amatabaza arindwi yarakaga akamurika mu mwijima. Ayo matara yuzuzwaga amavuta ya elayo, akaba ari ishusho y’Umwuka Wera (Zakariya 4.1-6).

Abizera nabo babasha kunyanyagiza urumuri, ariko ntibabibasha batari umwe na Kristo, kandi babishobozwa na Mwuka Wera.

Buri tabaza ryitabwagaho byihariye. Iyo urutambi rwazagaho amakara ntirwabashaga kuba rugitanze urumuri. Niyo mpamvu buri gihe umutambyi yagombaga kubanza kuvana imyanda yose ku rutambi. Uwizera ufite imyanda mu bugingo ntabasha kumurika uko bigomba. Umutambyi rero yakoreshaga utwuma twabigenewe ducuze muri zahabu. Wari umurimo wo kwitondera, ariko warangiraga urumuri rwongeye gushabira.

Urwo rumuri rwabanzaga rukagaragarira ku gitereko cy’amatabaza gishushanya Kristo. Kubara 8.3 hatubwira uko urwo rumuri rwagombaga kuba ruteretse.

 

Dukomeze iki gitekerezo: urumuri rutuvaho sitwe rugomba kugarukira, ahubwo rugomba kujya kuri Nyagasani Yesu. Niwe ugomba kumurikwa, guhabwa ikuzo!

Bidatinze, iyo mw’ijuru, azongera abe urumuri: …Ururembo rwa zahabu itavanze… kandi urwo rurembo ntirugomba kuvirwa n’izuba cyangwa ukwezi, kuko ubwiza bw’Imana ari bwo buruvira kandi Umwana w’intama (Kristo) ariwo tabaza ryarwo… (Ibyahishuwe 21.23).

Ameza y’imitsima yo kumurikwa

Kuva 25.23-30

Ahateganye n’igitereko cy’amatabaza hari ameza ya zahabu. Kuri ayo meza hariho imitsima 12 nk’uko umubare w’imiryango mu Bisiraheri wanganaga. Ameza ni Kristo (ibuka igiti kiyagirijweho zahabu). Nk’uko ayo meza yari ateretsweho imitsima, niko Kristo nawe ateruye ubwoko Imana yifitiye mu minsi ya none. Kuko We abateruye, babasha kunezeza Imana. Kandi rero Imana ibabonera mu mucyo wo mw’ijuru.

Imitsima 12 ishushanya imiryango yose yo mu bwoko bw’Imana. Ubwo ya moko 10 yajyanwaga muri Ashuri hagasigara amoko 2 gusa mu gihugu, ayo meza yakomeje kugaragaraho imitsima 12; icyo bitwigisha: mu mitima yacu, mu rukundo rwacu, mu masengesho yacu duhuriza hamwe ubwoko bwose bw’Imana. Buratatanye, bwacitsemo ibice. Ibyo tugomba kubimenya bidukoza isoni no gucishwa bugufi. Ariko muri abo bose, harimo abana b’Imana. Hariho UBUMWE. Imana imenya abayo kandi twifuza kubaramburira amaboko ya kivandimwe no kubakundisha umutima wose.

Data… ndabasabira… abo wampaye….

kugira ngo babe umwe nk’uko natwe turi umwe (Yohana 17)

Hariho umuguno wa zahabu ukikije ayo meza yose wari ubereyeho kugira ngo imitsima itagwa hasi.Uwo muguno wareshyaga n’ikiganza kimwe mu butambike bwawo. Nyagasani Yesu ni nk’uwo muguno wa zahabu. Ikiganza cye gikomeza abe. Akabarinda. Ese ibiganza by’Umwana w’Imana ntibifite imbaraga zo gukomeza no kurinda abe?

Umutsima

Buri sabato, imitsima yaribwaga n’abatambyi kandi bakayisimbuza imishya. Umutsima wo ku meza ya zahabu wari icyo kurya cy’abatambyi. Imana niko yari yarabitegetse.

Yohana 6.32-58 haravuga ngo: “Ninjye mutsima w’ubugingo waje uvuye mw’ijuru: urya uwo mutsima wese, azabaho iteka…”,

Ubugingo bw’abakristo butunzwe n’Umutsima nyakuri. Gutungwa nawe, kumushakashakira mw’Ijambo rye, kumwakira muri twe, kumwishimira, ibyo nibyo bidukuza mu buryo bwa mwuka kandi tukaronka umugisha nyakuri.

Igicaniro cya zahabu cyoserezwaho imibavu

Kuva 30.1-9

Ku gicaniro cya zahabu cyoserezwaho imibavu nta gitambo cyahatangirwaga nko ku gicaniro kinini cy’umuringa cyo hanze mu rugo. Imibavu ihumura neza yonyine niyo yashyirwagaho. Iyo mpumuro nziza inezeza Imana yaramuzamukiraga. Icyo iyo mibavu isobanura tukibona muri zaburi ya141.2 no mu Byahishuwe 8.3. Ni amasengesho y’abera (cyangwa abizera). Ariko kandi, nk’uko tubibona mu Abaheburayo 13.15, ni ishimwe, ikuzo no kuramya by’ubwoko bw’Imana. Ibyo byose bizamuka imbere y’Imana, ariko bigashyirwa ku gicaniro. Ni nkaho icyo gicaniro kibishyikiriza Imana. Bityo rero Kristo ajyana ku Mana amasengesho yacu no gushima. Ese ubundi bibasha kunezeza Imana ari twe gusa biturutseho? Oya, Kristo niwe ubyeza, akabitunganya. Bityo, uwizera wese abasha kwegera Imana, ari umutambyi, ariko kandi abana b’Imana hamwe ari ubutambyi bwera babasha gutura Imana ibitambo byo mu mwuka, bishimisha Imana kubwa Yesu Kristo (1 Petero 2.5-9).

Ntama, ku bw’imibabaro,

Wikorey’ imiruho yacu,

Maze ku Mana Data tuba

Abami kand’ Abatambyi.

Twese hamwe tuguhaye

Icyubahiro, no gushimwa,

Ububasha no kuganduka,

Na none turakuramya,

Bibe bityo Nyagasani.

Indilimbo ya 36

Ikiruhuko

Igishwi cyiboneye inzu, intashya yiboneye icyari, aho ishyira ibyana byayo (Zaburi 84.4). Noneho umwanditsi wa zaburi ahita yungamo ati: “ni ku bicaniro byawe, Uwiteka, Nyiringabo, Mwami wanjye, Mana yanjye”. Hano tubona ko ari ibicaniro byinshi kuko hariho bibiri. Umuntu abanza akaruhukira ku gicaniro cy’umuringa cyo mu rugo; bisobanura ko agomba kwakira imbabazi zo ku musaraba. Aho ni itangiriro ry’imibereho yo mu kwizera. Hanyuma akabona kuruhuka ko ku gicaniro cya zahabu cyoserezwaho imibavu, binyuze mu masengesho no kuramya.

Icyo ni ikintu gisumba ibindi byose umuntu abasha gukora; ibyo bihera hano kw’isi kandi ntibigira iherezo. Tukiri kw’isi tubasha kuramya no gukuza Imana, ariko nitugera iyo mw’ijuru, niwo murimo tuzakora kugeza igihe cy’iteka ryose (Ibyahishuwe 5).

Umubavu

Umubavu wagombaga gutegurwa nk’uko amabwiriza y’Imana kuri wo tuyasanga mu Kuva 30.34-38: ni igiteranyo cy’ibintu bine. Nta muntu wagombaga gukora usa nawo cyangwa ngo awihumurize. Umubavu wari ibanga ry’Imana yonyine. Bityo rero, umunezero wuzuye w’ikuzo ry’Umwana ukundwa ugenewe Data wenyine. Data ahoza ubutitsa ijisho ryuzuye urukundo ku Mwana.

“Uyu ni Umwana nkunda kandi nishimira…”

Muri cya gitambo gikongorwa twahabonye umurimo wo gucungura Kristo yasohoje – naho mu mubavu tubonamo icyo ari cyo we ubwe. Ntabwo ari icyo yakoze cyangwa yasohoje, uko cyaba kingana kose, ahubwo ni icyo we ari cyo. Umuntu ahora ari uw’agaciro kuruta icyo yakora cyose. Ubwo kubw’ibyo, twibuka ugukomera kwe, urukundo rwe rutangaje n’irindi kuzo rye ryinshi. Ese nk’abatambyi tubasha gutura Imana ibyo? Yego, tubasha kubiha Imana, tukamubwira icyo twabonye kandi tukitegereza mu Mwana we. Tubasha kureka tukuzura ibyo twabonye muri Nyagasani Yesu, ibyo twamwishimiyemo, maze tukabibwira Data. Bityo tugirana ubumwe na Data n’umwana we. Koko tumenye ko tutabasha gishimira uko bikwiye rwose icyo twaronse mu gucungurwa kwasohojwe n’imigisha yose igukomokamo. Ariko umubavu, kuramya, ni ikindi kirenze: ni ugufatanya na Data kwishimira icyo Umwana ari cyo, ubwiza bwe, urukundo rwe, ubutunzi bwite bwose bumurimo. Ni umubavu uhumura neza imbere ya Data.

Mwene Data, mushiki wanjye, mukunda Nyagasani Yesu: igihe mutekereza kuri we, ugukomera kwe, urukundo rwe… mubasha kwegera Imana no kuyibibwira; icyo nicyo cyitwa kuramya. Ni ugusesa narada yo mu bugingo bwacu, nk’uko Mariya w’i Betaniya yabigenje ubwo yasigaga ibirenge bya Yesu maze inzu yose igatamirana uwo mubavu (Yohana 12). Uko niko gutamba umubavu uhumura neza.

Hasi

Ese hasi, ahakandagirwa ho mu buturo hari hateguye hate? Ubasha gutekereza uti: ni nk’uko mu mpande hari hateguye: yari zahabu nsa. Cyangwa ukaba wavuga uti: hari hateguye imbaho. Ibyo bitekerezo byombi sibyo: hasi hari umusenyi gusa. Birashoboka se? Inzu y’Imana, ni ukuntu yari nziza bihebuje, iyateguriwe Umwami usumba bose, ikaba irimo umusenyi hasi? Ni koko, inzu y’Imana na bya bikoresho byose bya zahabu, yari yubatswe ku musenyi  gusa.

Icyo bisobanura kuri twe: ubwoko bw’Imana buri mu rugendo, inzira inyura mu butayu bubi butagira icyo buha ubugingo bushya bw’abakristo. Abagenzi barakomeje mu rugendo rwabo: hariho ingorane nyinshi, ibirushya, n’urucantege rwinshi, ndetse indwara no gupfa ntibyasigaye nabyo biratugose. Nyamara ntabwo turi twenyine. Imana iri kumwe natwe muri ubu butayu, iminsi yose. Ntabwo itererana ubwoko bwayo. Mbega urukundo! Mbega gushyigikirwa! No mu gihe uri mu ngorane, ari kumwe nawe aho. “Nahawe ubutware bwose mw’ijuru no mw’isi… Kandi dore ndi kumwe namwe iminsi yose” (Matayo 28.18-20). Nitwihangane kuko ari kumwe natwe. Vuba aha intego izagerwaho; nuko tuzaguma hafi ye.

Imijishi

Imijishi nayo isobanura urugendo mu butayu: “Ibikoresho” byo mu nzu y’Imana byarikorewaga. Imana yari kumwe n’ubwoko bwayo mu rugendo rwose.

Imijishi kandi itubwira iby’inshingano zacu. Abalewi nibo bikoreraga ibyo bikoresho bivuga ibya Kristo. Abababonaga bagenda mu butayu basobanukirwaga ko bikoreye iby’agaciro kenshi. Bityo rero natwe abizera niko twikoreye ibikomeye bitangaje. Turi abakire cyane kuko dufite Nyagasani Yesu Kristo nk’ubutunzi bukomeye. Tubasha kumwerekana, tukamumenyekanisha tugaragaza imbere y’abandi icyo tumufitemo. Tubasha rero kumuhamiririza kugira ngo abanyabyaha bakizwe. Ese koko niko tubigenza? Ese imijishi ituri ku ntugu turikoreye? Abantu bamenya urukundo rw’Imana ikiza ari twe binyuzemo. Imana ikoresha abanyabyaha bakijijwe kugira ngo isakaze ubutumwa bwiza. Icyaduha gufatanya dukora umurimo wo kwikorera!

Umutambyi mukuru

Kuva 28

Uwabonye umutambyi mukuru wese… Nashakaga kuvuga nako ko uwabonye imyenda ye maze agasobanukirwa n’icyo itubwira ku Mutambyi Mukuru wo mw’ijuru… agira gushimira gukomeye, kuko abasha noneho kubaho anezerewe kandi ari mu cyizere gihamye.

Efodi

Mbere nambere tuvuge kuri efodi: niwo mwambaro wo hejuru y’ikanzuy’umutambyi mukuru. Yari igizwe n’amabara ane twamaze kumenya. Ariko hari ikindi! Indodo za zahabu zari zisobekeranyije muri ayo mabara. Twamaze kubona ko zahabu ivuga ikuzo ryo mw’ijuru. Erega Nyagasani Yesu ubu ni Umutambyi Mukuru wacu iyo mw’ijuru.

Yari hano mw’isi, azi neza kuyibamo icyo aricyo. Amenya imibabaro n’amakuba yaho kurusha undi wese. Ubu abasha gufatanya natwe, kandi arabikora rwose. Azi ibyacu byose; ibyawe n’ibyanjye. Afasha abe. Ni Umutambyi Mukuru ufatanya mu byacu (Abaheburayo 4.15).

Amabuye yo ku mishumi yo ntugu

Aya mabuye yombi yo ku mishumi yo ku ntugu z’Umutambyi Mukuru se yo asobanura iki? Ni amabuye y’agaciro yanditsweho amazina atandatu kuri buri buye rimwe. Amazina yose yari cumi n’abiri, nk’uko imiryango yose ya Isiraheri yari. Bityo Nyagasani Yesu ateruye abe, nibwo bwoko bw’Imana, abahetse ku bitugu bye bikomeye.Ni nk’uko umushumba mwiza aheka intama ye ku bitugu ayigarura imuhira.

Umwambaro wo ku gituza

Uwo mwambaro wanganaga impande zose, uremeshejwe imikwege ya zahabu kandi uriho amabuye y’igiciro arabagirana akwikiye muri zahabu yanditsweho amazina cumi n’abiri y’ubwoko bw’Abisiraheri. Amabuye y’agaciro ni ibyo ubutaka bubasha gutanga bifite agaciro gakomeye; ikiguzi cyayo gihora gihanitse. Hano tubona ko buri zina ryanditse kw’ibuye ritandukanye. Ntabwo ari kimwe n’amabuye yo ku mishumi yo ku ntugu. Aho yari amabuye abiri gusa, ariko aha ni cumi n’abiri atandukanye. Aho, ubwoko bwari bufatanyirijwe hamwe ariko aha buri zina ryanditswe kw’ibuye ryihariye. Izo ni impamvu ebyiri zo gutuma tunezerwa. Nyagasani Yesu aduteruriye hamwe, twebwe Itorero rye, nk’ikizima kimwe (intugu). Kandi amenya buri wese mu mwihariko we (igituza). Iyo wakijijwe, izina ryawe rimenyekana iyo mw’ijuru, Nyagasani Yesu agufata nk’ibuye ry’agaciro. Ako gaciro ntabwo tukiha ubwacu, ahubwo twakaronkeye kuri we. Agushyize ku mutima we wuzuye urukundo.

Ntabwo ibi bireba abatarizera. Dusoma mu Byanditswe byera ko Imana itabazi mu mazina. Ibuka inkuru y’umutunzi wo muri Luka 16. Izina rye ntabwo ryavuzwe. Ariko irya Lazaro ryo turaribona ndetse rigasobanura ngo: Imana, Umufasha wanjye. Mw’isi ntabwo yari uzwi nyamara mw’ijuru ho yari azwi cyane.

Amazina y’abizera aranditswe, mu buryo bwo guharaturwa: ntabwo abasha gusiba iteka. Arabagirana mu mucyo w’ijuru. Uko umucyo urushaho kuba mwinshi, nayo arushaho kurabagirana. Byose ni kubw’ubuntu kandi biva ku Mutambyi Mukuru.

Twese hamwe ku bitugu bye

- Duhetswe n’imbaraga ze.

Buri wese mu mwihariko ari ku mutima we

- Ahetswe n’urukundo rwe.

Abera barwanywa,

Impande zose

Bafit’ intege nke

Hano mw’iyi si;

Bariyo mu ijuru.

Ubitayeho,

Mutambyi mukuru

Usumba abandi!

Wuj’igikundiro

N’ineza nyinshi,

Ntujya wibagirwa

Abacunguwe.

Indilimbo ya 122.1.2a

 

“Nicyo gituma, bene Data bera, mwebwe abafatanije guhamagarwa kuva mw’ijuru, mukwiriye gutekereza Yesu…” (Abaheburayo 3) “…ahoraho iteka ngo abasabire. Byari bikwiriye ko tugira Umutambyi Mukuru umeze atyo.” (Abaheburayo 7).

Urimu na tumimu

Umwambaro wo ku gituza wari inkubirane (umeze nk’uruhago). Impamvu ni uko hari icyari gihishemo: niho hari habitswe urimu na tumimu. Birashoboka ko ibyo byombi byari nabyo amabuye y’agaciro: ayo mazina asobanura ngo “Umucyo n’Ubutungane”. Iyo hari ufite ikibazo gikomeye agomba gufatira icyemezo kandi akaba atazi neza icyo Imana ikivugaho, yaganaga umutambyi mukuru. Hakoreshejwe urimu na tumimu yabashaga kumenyekanisha nta kwibeshya icyo Imana

ibivugaho no gushaka kwayo. Binyuze muri iyo nzira, Imana yasubizaga ikibazo kandi igatanga neza umucyo w’inzira yo kunyuramo. Kuri Dawudi niko byamugendekeye, muri Samweli 30.7 na 8. Reba na 28.6 no Kubara 27.21; Ezira 2.63. Hari uwavuga ati: iyaba natwe kuri ubu twari dufite umutambyi mukuru ubasha kutwereka inzira mu bintu byose! Erega turamufite! Ntari hano kw’isi – kandi rero niyo mahoro yacu. Ahari twakagombye gukora urugendo rurerure cyane ngo tumuture ikibazo cyacu. Uwacu ari mw’ijuru ariko dushyikirana nawe mu buryo butaziguye binyuze mu masengesho. Tubasha gusanga uwo Mutambyi Mukuru wacu tumushyiriye buri kibazo kyacu cyose. Ariyo ku bwacu. Abereyeho abe. Ntabwo areka tuguma mu kajugane. Tubasha kumubwira byose – maze tugategereza mw’ituze igisubizo cye. Mu gihe we ubwe azahitamo, azatumenyesha neza inzira yo kunyuramo. “Nzakwigisha nkwereke inzira unyura; nzakugira inama, ijisho ryanjye rizakugumaho” (Zaburi 32.8).

Ikanzu iriho efodi

Ikanzu iriho efodi yari iboshywe yose mw’ibara ry’umukara wa kabayonga gusa (ubururu). Ku musozo w’uwo mwenda hariho ibisa n’imbuto z’amakomamanga mu mabara atatu kandi hagati y’urubuto n’urundi harimo igisa n’umudende wa zahabu. Kubitekerezaho n’iby’igikundiro: iyo midende itanga ijwi, ijwi ryonyine, amagambo gusa, ibyo ntibihagije. Nicyo gituma yari irobetswemo imbuto. Uko imbuto zingana niko n’inzogera zingana: ibikorwa n’amagambo. Ibyo bireshyeshywa neza muri Kristo… (Luka 24.19).

Igitambaro kizinze cyo mu mutwe

Kuri icyo gitambara cyo mu mutwe kiboshywe mu budodo bwera cyane hariho, mu ruhanga rw’umutambyi mukuru, hejuru, igisate cya zahabu itavanze cyanditseho aya magambo ngo: YEREJWE UWITEKA.

Ubwoko bw’Imana ntabwo bwari ubukiranuka. Nyamara Imana yabonaga kiriya gisate cya zahabu n’amagambo acyanditseho maze bukitwa ubwejejwe. Na none ubwoko bw’Imana ni ubwera kandi bunezeza Imana gusa kubera ko buri muri Nyagasani Yesu, Umutambyi wacu Mukuru.

“…kugira ngo… biduheshe ihumure rikomeye, twebwe abacikiye gusingira ibyiringiro byashyizwe imbere yacu. Ibyo byiringiro tubifite nk’igitsika mutima, gikomeye kandi gishikamye, kinjira hirya y’umwenda ukingiriza Ahera cyane, aho Yesu yatwinjiriye, atubanjirije, amaze guhinduka Umutambyi Mukuru iteka ryose…” (Abaheburayo 6.18-20).

Ahera cyane, isanduku y’isezerano

Kuva 25.10-22

Noneho tubasha kwinjira Ahera cyane. Ese ni iki cyari aho? Aho hantu hatunganye hanganaga na mikono 10 mu bugari, 10 mu burebure, 10 mu bujyejuru. Kandi yari zahabu gusa. Aho ngaho inyuma y’urusika niho hari hateretse isanduku, niyo ntebe ya cyami y’Imana. Aho niho Imana yari ituye.

Isanduku y’isezerano yari ikozwe mu giti, mu mbaho, kandi yari iyangirijweho, imbere n’inyuma, zahabu nziza. Ubwo rero tubona ko Isanduku y’isezerano ari ishusho ya Kristo. Iyo sanduku yari itwikirijwe umufuniko munini wa zahabu: ni intebe y’ihongerero, yari mikono 2.5 kuri 1.5 igeretseho abakerubi babiri bacuze muri zahabu. Aho niho Imana yari ituye mu mucyo urabagirana kandi utegerwa. Uwo mucyo wari ugoswe n’igicu kijimye. “Kuko umuntu atandeba mu maso maze abeho” (Kuva 33.20).

Amahirwe yacu ni uko turi mu gihe cy’ubuntu, si icy’amategeko (Abaroma 6.18-20). Abizeye Kristo, ubu babasha kwitegereza ubwiza bwa Nyagasani badatwikiriye uburanga bwabo (2 Abakorinto 3.18).

Ibyari mu isanduku y’isezerano

Ibyari muri iyo sanduku y’isezerano nabyo byerekana ko ari igishushanyo cya Kristo. Harimo amategeko icumi (Kuva 25.16). Niwe washoboye kubwira Se ubwo yari hano mw’isi, ati: “Ni koko, amategeko yawe ari mu mutima wanjye” (Zaburi 40.8). Bityo Nyagasani Yesu yahoranaga amategeko y’Imana mu mutima we.

Harimo kandi urwabya rwa zahabu rwarimo manu (Abaheburayo 9.4; Kuva 16.33-34). Kristo niwe Manu nyakuri: ibyo kurya byo mu rugendo nk’uko tubibona muri Yohana 6. Ahera cyane hadushushanyiriza ijuru; aho ntabwo manu izaba igikenewe. Nonese aho ihamara iki? Ni ikimenyetso cy’umunezero wa Kristo tubona tukiri hano mw’isi.

Icya gatatu cyarimo (cyangwa se cyari hafi yayo) ni inkoni (ishami ry’umukomamanga) ya Aroni yari yarapfunditse uburabyo (Kubara 17). Umukomamanga ni igiti kirabya mbere y’ibindi byose: bityo kikavuga iby’ubugingo nyuma y’urupfu rwo mu gihe cy’imbeho ikabije, nirwo rupfu. Niyo mpamvu iyo nkoni ivuga ibyo kuzuka, ibya Kristo, Uwatsinze kandi akaba ari Umutambyi Mukuru uhoraho.

Intebe y’ihongerero

Yari umufuniko w’isanduku y’isezerano. Aho niho hari intebe ya cyami y’Imana ishobora byose. Iyo yagombaga kuba intebe y’urubanza. Amategeko Isiraheri yari yarananiwe yari munsi y’iyo ntebe. Imana yari ituye hagati y’ubwoko bw’abanyabyaha. Yagombaga kuba yarabarimbuye, bakibagirana iteka. Ariko rimwe mu mwaka, aho haminjagirwaga amaraso n’umutambyi mukuru. Ayo maraso avuga iby’Igitambo gishyitse. Bityo iyo ntebe y’urubanza yahindutse intebe y’ubuntu (Abaroma 3.25).

Abakerubi

Abakerubi ni byo biremwa bisumba byose. Ni abarinzi b’intebe ya cyami y’Imana. Abakerubi bafite inkota zivanywe mu rwubati barindaga Edeni ngo Adamu na Eva batayisubiramo (Itangiriro 3). Ariko mu buturo bw’Imana, aho bafitanye isano n’ubuntu.

Bari baramburiye amababa yabo hejuru y’intebe y’ihongerero. Bari bunamye bari nk’abaramya, bareba amaraso yaminjiriwe aho (Abalewi 16).

Intebe

Umutambyi Mukuru ukomeye, niwe Nyagasani Yesu, yanyuze mw’ijuru maze ashyikiriza Imana amaraso ye. Kuri ibyo wasoma Abaheburayo 4.14-16 na 9.11-12. Kuri ubu nta ntebe y’urubanza iri mw’ijuru; hariyo intebe y’ubuntu. Arahirwa uza asanga iyo ntebe UYU MUNSI ngo ahabwe imbabazi, niko kubonera umugisha ku Mana. Igihe cy’ubuntu kimaze kumara imyaka isaga 2000 kandi kigeze kw’iherezo. Hamwe no kugaruka kwa Kristo, igihe cy’urubanza kiraba gitangiye. Igihe cy’ubuntu kiraba gishyizweho iherezo, gukizwa kuzaba kutagishobotse. Igihe kizaba cyarenze, maze kuri babandi bataragakizwa hazaba hasigaye indi ntebe imwe gusa: Intebe y’urubanza. Mu Byahishuwe 20.11-15, tubona abapfuye, abakuru n’abato, bahagaraye imbere y’intebe nini yera: aho nta n’umwe uzababarirwa. Abatazaba baregereye intebe y’ubuntu bose bagomba kuzitaba imbere y’iyo ntebe y’umunyacyubahiro iteye ubwoba. Bazumva urwo bazacirwa kandi barwemere bagira bati: “Kubw’ibicumuro byanjye, nkwiriye rwose guhanwa; nanze gukizwa nkiri mw’isi. Ubu ngiye kujugunywa mu Nyanja y’umuriro n’amazuku. Ndarimbutse kandi si ikosa ry’Imana. Mu rukundo rwayo rwinshi, yashatse kunkiza ariko ndanangira.”

 

Bizaba ari akaga gakomeye katagira iherezo! Amarira no guhekenya amenyo bavuga ngo: “Iyo nkiza gutege amatwi; nyamara nari hafi cyane; none dore ni umwijima wo hanze iteka ryose”.

Ugusaba kwacu kwa buri gihe ni uku: ukwifuza kw’Imana ihoza ku mutima, ni uko wowe usoma iki gitabo wanezerwa kubw’igihe cy’iteka ryose!

Inzu ya zahabu - ikaze!

Twari hanze, kure y’Imana. Twari abanyabyaha, abanzi. Twarimo umwenda uremereye watumaga tugomba guhezwa hanzwe, mu byago, mw’icuraburindi ryo hanze, mw’ijoro ry’iteka ryose.

Twinjiriye mu irembo rikinguye. Nyagasani Yesu niwe rembo.

Ku gicaniro twahabonye urukundo rw’Imana yakubise Umwana wayo ikunda ku musaraba. Aho twahaboneye urukundo rw’Imana n’amahoro yayo.

Twarenze igikarabiro maze twinjira munzu ya zahabu. Byarenze uko twamenya. Twaboneye ubutunzi bwa Nyagasani Yesu mu gitereko cy’amatabaza, ameza n’igicaniro cya zahabu.

Tunyuze mu rusika, twageze mu mucyo wo mw’ijuru ukikije intebe y’Imana. Aho niho iwacu. Aho niho Imana ishaka kubona abanyabyaha bakijijwe. 61 Ese ni inzozi? Oya ni ukuri! Imana tuyirebesha ukwizera, ariko noneho bidatinze tuzayirebesha amaso. Mbega urukundo rw’Imana! Mbega uko ubuntu bwayo ari bwinshi! Mbega uko usohoza ibyo byose ari mwiza, niwe Mwana w’Imana! Ninde usa nawe…?

Uhamya ibyo, aragira ati: “Yego, ndaza vuba” (Ibyahishuwe 22). Ubwo azazanwa no gushaka abe, indirimbo y’ishimwe ihoraho y’abacunguwe batabarika izumvikana mw’ijuru. Indirimbo y’urusobe izaririmbwa mu majwi ahanitse aherekejwe n’inanga:

Kuri wowe udukunda,

Watwogeje ibyaha kubw’amaraso yawe;

Mu maraso:

Kandi ukaduhindura abami

N’abatambyi b’Imana Data niyo So;

Nuhabwe ikuzo,

Ni uhabwe ubutware,

Iteka n’iteka!

Amen, Amen!

Indilimbo ya 225

 

Ese nawe uzaba uri kumwe nabo? Igihe azaba yinjiza abe munzu ya zahabu, nawe uzaba uhari? Mbega ibitangaje biri mu nzira iganayo! Ubasha nawe kuba muri uwo mubare. Uhawe ikaze.

Musange Umukiza ubakunda

Niwe witanze ku giti;

We ubwe arashaka kubakira,

Nimwe ategereje.

Indilimbo ya 263.162

 

Kuronka agakiza! Mbega inkuru nziza

Ku bari mu byaha!

Yomora Imitima, uruguma runini,

Igakiza ubwoba!

Kuzwa Ntama Wera! Imbaraga gushimwa,

N’ibyo uwababajwe

Akabambwa agapfa kugirango adukize!

Twe turakuramya!

Indilimbo ya 150.2.4