Select your language
Afrikaans
Arabic
Basque
Bulgarian
Catalan
Chichewa
Chinese
Croatian
Czech
Danish
Dutch
English
Farsi
Fijian
Filipino
French
German
Greek
Hebrew
Italian
Japanese
Kinyarwanda
Kisongie
Korean
Lingala
Malagasy
Norwegian
Nuer (Sudan/South-Sudan)
Oromo
Polish
Portuguese
Romanian
Russian
Slovak
Somali
Spanish
Swahili
Swedish
Tshiluba (DR Congo)
Turkish
Welsh

Ko Ira Nai Tokani I Karisito Era Soqoni Ena Yaca Ni Turaga Ko Jisu

Ko ira era soqoni tiko ena yaca ni Turaga ko Jisu

Ko Jisu Karisito na Luve ni Kalou bula e a sa solia tu e dua na vosa ni yalayala ena Maciu 18 tikina e 20, ka vaka koto oqo, "Ia e na tikina sa soqoni vata kina e lewe rua, se lewe tolu, e na yacaqu, au sa tiko kina ena kedratou maliwa."

Na vosa ni yalayala oya e sa kena i balebale ni ko Jisu vakataki koya ena usutu ni nodra vakasoqoni vata nai tokani i Karisito.

Ko Jisu vakataki koya e sa nai lutua ni veika kecega eda cakava se levu se lalai? Ia, e dua na ka vakaloloma ni sa sega ni vakakina ena gauna edaidai. Ia era tiko nai tokani i Karisito e ra taurivaka ka soqoni duadua ga ena yaca ni Turaga ko Jisu. Era dau vakayagataka nai vakayakavi ni Turaga ena vei matai ni Siga ni Wiki (Siga Tabu). Era dau vakasoqoni vata vakawasoma me ra masumasu ka me ra qarava matua na nodrai vakavuvuli nai apositolo ena kena i valavala ga ka tauyavutaki taumada kina na lotu ni Turaga (Cakacaka 2:42)

Ko cei ko ira oqo?

Ko ira oqo era vakadinadinataka ni ra sa tamata i valavala ca sara ena mata ni Kalou savasava. Era vakabauta ni sai Jisu Karisito ga, e colata na nodra i valavala ca ena yagona e na kauvelatai (1Pita 2 tikina 24). Era vakadinadinataka ni ra tamata i valavala ca ka ra sa vakatusa ena mata ni Kalou bula, ka ra sa vakabauta ni sa yalodina ka yaladodonu ko koya me bokoca na nodrai valavala ca, ka vakasavasavataki ira mai na ka kecega sa sega ni dodonu (1Joni 1 tikina 9). Ena nodra ciqomi Jisu ki na nodra bula, sa solia vei ira ko Koya me ra yaco rawa me ra luve ni Kalou, vei ira sa vakabauta na yacana (Joni 1 tikina e 12 kei na 13). Ena yago i Jisu Karisito ni sa cabori vakadua, sa yaco kina me ra vakasavasavataki ena vuku ni nona loloma. (1Periu 10 tikina 10).

Era vinaka beka li mai vei ira tale na vei soqosoqo lotu eso ko ira oqo?

O ira era vakabulai walega e na loloma ni Kalou (grace), o koya ka sereki ira, maroroi ira ka rawa ni ra na vakararavi tiko kina ena veigauna eso era na malumalumu kina vakayalo.

Era kila tiko ni tamata makawa kei na kenai tovo vakayago e sa bula tikoga ka sa bibi me ra na vakamatea tiko ena veigauna kece. Kevaka e sega, e na rawa ni rogoca kina na yaca ni Turaga. Sa rui vinaka na Kalou ni sa rawa ni vakavouia na tamata makawa ki na dua na tamata vou, o koya e dodonu me na kune tiko kina na bula dina va-kalou (Efeso 2 tikina 10). E usutu ni nodra bula ena veisiga me ra veilomani, ka sa ka e bibi vei ira na duavata me vaka ni ra sa veitiki ni yago i Karisito. Na veitokani va-karisito vakaoqo e sa sega soti ni kune e na gauna edaidai ena vuku ni veivakavuvuli cala eso vaka-tamata ka sa tu ena gauna edaidai (1Timoci 4 tikina 1).

A cava era sega ni vakatokayacataki kina ena dua na yaca ko ira oqo?

Nai Vola Tabu e vakawabokotaka na tatawasewase kei na veiletitaki ni lotu, "Dou sa sega li ni vakayago, ni sa kaya tiko e dua, Oi au nei Paula; ka dua tani, Oi au sa nei Apolosa? Ia, ko cei ko Apolosa? Se ko cei ko Paula? Ai talatala walega, dou sa vakabauta ena vukudrau.?" (1Koronica 3 tikina 4 kei 5).

"Ia mai Anitioki era sa vakatokai mada eliu ko ira sa lotu mei tokani i Karisito" (Cakacaka 11 tikina 26).

Ena vuku ni vakaro ni Vola Tabu, era vinakata me ra sa tokara saraga na yaca i Karisito ka me kakua ni vakayacani ki na dua na tamata, i tikotiko se i yaca buli vakaitaukei. Na tatawasewase kei na veiletitaki ni lotu e sega ni a vakatavuvulitaka ko Jisu Karisito. Na veilomani kei na duavata sa usutu ni nona sasaga vei keda.

Na i vakavuvuli cava era taurivaka tiko?

E nodra takete me ra muria na veivakavuvuli eso ka sa dusimaka oti koto na i Vosa ni Kalou. (E sega tale ni dua nai voladusidusi e ra muria, nai Vola Tabu ga). Era sa rai vakatabakidua saraga ki nai Vola Tabu. Ni sai koya oqo nai vola dusidusi ni Kalou vei keda, ka sa ceguva oti ka vakalougatataka talega na Kalou me rauti keda saraga vakavinaka.

"Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakavuvuli e na ka e dodonu" (2Timoci 3 tikina 16).

E ra vakabauta ni ko Jisu Karisito e luve ni Kalou bula, kunekunetaki mai vua na Yalo Tabu, ka qai sucu mai vua na marama ko Meri. E a vakararawataki, mate, ka qai tucake tale mai na mate, ka sa dabe tiko ena gauna oqo ena liga i matau ni Kalou bula.

Na cava na usutu tudei ni nodra sasaga?

E nodra sasaga me ra vakadamurimuria na i vakavuvuli ka sa dusimaka oti koto nai Vola Tabu.

Ena vuku gona ni ka oqo, e vuqa vaka vuqa na tamata era sa biuta na vei mata lotu kilai eso baleta ni sa sega vi vakarokorokotaki kina na lewa ni Turaga kei na Yalo Tabu. Nai dusidusi mai na i Vola Tabu era raica nai tokani i Karisito ni tamata vakabauta dina kece sara era sa vakatokai mera bete ka sa rawa ni ra cakava talega na cakacaka vakai talatala.

O ira kece era sa sucu vou - o ira nai tokani i Karisito - era sa veivatu bula, ka ra sa tara cake me ra vale vakayalo, me matabete yalosavasava, me ra cabora kina nai madrali vakayalo - sa vinaka vua na Kalou ena vuku i Jisu Karisito (1Pita 2 tikina 5).

Na cava na vuna mo biuta kina veisoqosoqo lotu Seja ni vakaivolatabu?

Baleta na Kalou e sega ni taleitaka me veiwakivata na rarama kei na butobuto se tamata vakabauta kei na tamata tawa vakabauta. E kaya vakaoqo na i Apositolo ko Paula "Dou kakua ni veitokani vata vakatani kei ira era sa sega ni vakabauta: sa veitokani vakaevei na yalododonu kei na tawa-yalododonu? Se rau sa veiwekani vakaevei na rarama kei na butobuto" (2Koronica 6 tikina 14 kei 15).

Kevaka erau na veitokani na tamata vakabauta kei ira sa vesuki tu enai valavala ca, se veitokani kei ira sa taurivaka ka vakatavuvulitaka cala tiko na veika me baleta na loma ni Kalou, era na sega ni rawa ni na vakarokorokotaka na Kalou, me vaka e nakita o keya.

Koya gona e kaya kina na Kalou "Ia na yavu dei ni Kalou sa tu ga, ia sa vakaoqo na vosa sa volai kina, sa Kilai ira na nona tamata na Turaga: ka, Me ra lako tani mai nai valavala ca ko ira yadua era sa cavuta na yaca i Karisito" (2Timoci 2 tikina 19).

E sega beka li ni dua tale nai vakavuvuli vou oqo?

Nai vola Tabu e tukuna vakamatata ni soqosoqo se mata i lawalawa sega ni va-kalou ko ira era muria na i vakavuvuli ni dua na tamata se me ra laveta cake na bula ni tamata ka tekivutaka nai lawalawa oya (Cakacaka 5 tikina 17; wase 15 tikina 5; Taito 3 tikina 9, 10 kei 11; 1Koronica 3 tikina 3, 4 kei na 21).

Ia nai tokani dina i Karisito ena sega tale ni qai tauyavutaka tale e dua na yavu vou se i soqosoqo vou. Baleta kevaka me da rai lesu ga ki nai Vola Tabu ka vakatavuvukitaka na nodrai vakavuvuli nai Apositolo ena gauna ka tauyavutaki taumada kina na lotu, ka me kakua ni da riba tani mai kina, ke a sega ni levu tu na tatawasewase me vaka sa laurai tu ena gauna edaidai.

Ko ira nai tokani Karisito oqo era via taqomaka walega na duavata vakai Vola Tabu kei na veivinakati (Efeso 4 tikina 3). Kevaka eda na via taqomaka na lomavata kei na duavata ka vinakata na Kalou, sa dodonu me da rai lesu ga ki nai Vola Tabu ni vanua oqo ena kune duadua kina na loma ni Kalou vei keda.

Na cava e gadreva na Kalou vei keda?

Me da duavata se dua bauga. E da wilika ni ko ira nai tokani i Karisito taumada era "qarava matua na nodrai vakavuvuli nai Apositolo kei na veilomani, kei na dovi madrai, kei na masumasu" (Cakacaka 2 tikina 42). E kaya talega nai Vola Tabu me baleta na duavata oqo ni "sa dua bauga na yago, dua na Yalo Tabu, dua nai nuinui, dua na veipapitaisotaki, dua bauga na Kalou na Tamada o koya sa lewa na ka kecega (Efeso 4 tikina 4 kina 6).

Sa vakarautaka e dua na yago na Kalou me da semai ka me da veitiki ni yago oya. Ia me na kakua ni tawase na yago oya (1Koronica 12 tikina 24 kei na 25).

"Ia kau sa vakamasuti kemudou, na veiwekani, e na yaca ni noda Turaga ko Jisu Karisito, mo dou tauvata kecega e na vosa, ia me kakua vei kemudou na veisei, mo dou veivinakati sara ni dou sa lomavata ka lewa vata" (1Koronica 1 tikina 10).

. me ra dua bau kecega. (Joni 17 tikina 21).

Gauna cava sara ka sa bula voli mai kina na lotu?

Ko Jisu a kaya vei Pita ". Au na tara na noqui soqosoqo lewe ni lotu . (Maciu 16 tikina 18). Na mala ni vosa oya nei Jisu e vakaraitaka ni soqosoqo lotu a sa bera ni tauyavutaki. Na yavu ni soqosoqo lotu nei Karisito eratou a vakotora ko iratou nai Apositolo kei ira na parofita ni veiyalayalati vou (Efeso 2 tikina 19-20). Nai soqosoqo lotu talega oqo e sa na nona i tikotiko na Kalou ena vuravura oqo.

E kaya ko Paula ki nai soqosoqo lewe ni lotu mai Koronica "Ni sa sega ni rawata e dua na tamata me viritaka na yavu tani, ko ya ga sa viritaki tu, ko Jisu Karisito ga" (1Koronica 3 tikina 11).

Na tauyavutaki ni soqosoqo lotu nei Karisito e vakatakilakilataki ena kena a sovaraki mai na Yalo Tabu ena siga ni Penitiko ka volai koto ena Cakacaka wase 2. Na Yalo Tabu e tiko voli ena maliwa ni soqosoqo lotu ka vakatokai talega me vale ni Kalou (1Koronica 3 tikina 16).

Na cava e dau vakayacori ena nodra gauna ni soqoni?

Nai tokani Karisito era vakabauta ka vakararavi vakatabakidua ga ki na vosa ni yalayala ni Turaga ko Jisu ena nona a kaya "ni na tiko vakaidina ena kedra maliwa era na soqoni ena vuku ni yacana" (Maciu 18 tikina 20). Keimami sega ni vakaliuca vakadua na tamata se dua me vakatokai mei talatala (clergy) ena gauna ni neimami soqoni.

Kevaka sa dina na vosa ni 1Periu 2 tikina 12, sa kena i balebale ni sa sega tale ni dua nai liuliu e gadrevi. E na Veiyalayalati Vou, e sega ni kune kina ni dodonu me digitaki e dua na tamata me nona vakatabakidua na vakatulewa ena gauna ni soqoni, se me da kaya ni taukena kece ko koya nai solisoli ni Yalo Tabu. Ena lotu taumada, vei ira era soli ira vakatabakidua tu ki na cakacaka ni lotu, era i talai walega ni Kalou ka ra liga ni nona cakacaka. Ia ka sega ga ni laurai me ra uasivi cake mai vei ira na vo ni tokani Karisito. Na vakasama ni nodra sa laveti cake ka raici cake ko ira nai talatala me vaka e laurai tu e gauna edaiedai e a sega ni vakatavuvulitaka nai Vola Tabu.

Ki nai soqosoqo lewe ni lotu, e kaya ko Paula, "ni dou sa soqoni vata, dou sa dui taura yadua na sere, ai vakavuvuli ai vakatakilakila, a vosa tani, na lave vosa" (1Koronica 14 tikina 26).

E da raica ni lesi nai tavi yadua vei ira nai tokani i Karisito ena gauna ni nodra soqoni baleta ni da yago vata kece tiko i Jisu Karisito ka me da veitauriligataka vata kece na kena tarai cake na yago oqo, se soqosoqo lotu.

Ena sega beka na veisei ena kedra maliwa?

Ena gauna era sa vakararavi vakatabakidua kina nai tokani i Karisito ki nai vakavuvuli ni Kalou ka me ra qai vakaliuca na Yalo Tabu, eda na raica na totoka, talei, kei na rokovi ni soqoni baleta ni sa vakayacori tiko ena dela ni nona vosa bula. "Ni sa sega ni vu ni veisei na Kalou, sa vu ni vakacegu ga, me vaka sa yaco e nai soqosoqo lotu nei Karisito" (1Koronica 14 tikina 33).

Kevaka eda na vakamuria na loma ni Kalou ka kune ena veiyalayalati vou, e sa na yaco me taucoko na veika kecega ka ra na tuberi talega nai tokani Karisito me ra tamata bula ka tudei ena i vakavuvuli dina ka sa na tarai cake vaka talega kina na yago i Karisito (Efeso 4 tikina 11-12; 1Koronica 14 tikina 29).

Ena veisoqoni kece sara, era dau galu na yalewa ka me ra kakua ni vosa ena gauna ni so-kalou ni sai vakaro ni Vola Tabu oqo vei keimami (1Koronica 14 tikina 34; 1Timoci 2 tikina 11-12).

Kevaka e dua e via lewena, a cava me na cakava?

O ira nai tokani Karisito oqo era sega ni bulia e dua tani tale nai soqosoqo se yavu vou me rawa ni vakamuri me rawa kina ni qai dua e lewena. Me vaka e kaya vakamatata tu nai Vola Tabu ni soqosoqo lotu e yago vakayalo i Karisito. Sai koya talega na vanua oqo e nodrai tikotiko na luve dina ni Kalou.

"Me vaka sa dua bauga na yagoda, ka vuqa na tikida, ia ka sa sega ni vakaitavi vata na tikida kecega, sa vaka-kina koi keda, na lewe vuqa, eda sa yago vata ni da sa tu vata kei Karisito, eda sa veitikina vaka talega vakai keda" (Roma 12 tikina 4-5).

"Me vaka sa dua bauga na yago, ka sa vuqa na kena tikina, ia na tiki ni yago kecega, sa vuqa ga, ka sa dua bauga na yago: sa vaka talega kina na Karisito. Ni da sa papitaisotaki kecega ki na yago e dua bauga e na Yalo Tabu e dua bauga" (1Koronica 12 tikina 12-13).

Ni ko sa talairawarawa ga ki na nona vosa, sa na qai nonai tavi ga na Kalou me vakaikuritaki iko ki na nona i soqosoqo lewe ni lotu (Cakacaka 2 tikina 47).

Na cava na nomu vakatulewa ena veika oqo?

Kevaka ko na via talairawarawa ena nona vosa bula na Kalou, Ia sa dodonu mo na vakataki ira nai tokani Karisito mai Peria, "ni ra sa uasivi cake vei ira na kai Cesalonaika ni ra sa vakarogoca na vosa ena loma e vinakata sara, a ra sa dauvakasaqaqara e nai Vola Tabu e na veisiga se sa vakakina na vosa oqori se segai?" (Cakacaka 17 tikina 11).

Vakasamataka ka masulaka na vei taro oqo -:

E vei beka na vanua era soqoni tiko kina nai tokani Karisito oqo? -

Ena vakaraitaka vakaidina vei iko na Kalou kevaka ko sa via muria dina na lomana. E rua na ka oqo mo vakayacora -:

Mo masulaka ena vu-ni yalomu dina mai loma vua na kalou ka mo qai dikeva matua nai Vola Tabu se sa vakakina na veika oqo se segai?

Ke so na veivuke se kerei vakasala, veitaratara ki na veivanua ka voleka vei iko

Translated by Sekaia Mara, Nabua, Suva, Fiji Islands

Search the Scriptures, P.O. Box 583, Werribee, VIC 3030 Australia

Bible Distributors, Fountain House,  Conduit Mews, London, SE18 7AP UK, © 2003 - Used by permission